Danskit naalakkersuisuisa toqqammavissaat ullumikkut saqqummiunneqalersoq

Mette Frederiksenip, Pia Olsen Dyhrip, Lars Løkke Rasmussenip aamma Martin Lidegaardip Danmarkimi naalakkersuisunngortussat toqqammavissaat marlunngornermi nalunaaqutaq 16.00 saqqummiutissavaat.

Tamanna ministeriunerup allaffianit tusagassiuutinut nalunaarummi ilisimatitsissutigineqarpoq.

Mette Frederiksenip Socialdemokratiet, SF, Moderaterne aamma Radikale naalakkersuisunngortitsisinnaanerat kunngi Frederikimut ataasinngornermi unnukkut oqaluttuaraa.

naalakkersuisut toqqammavissaat Folketingimut qinersisoqarneranit sapaatip-akunneri qulit qaangiuttut saqqummiunneqassaaq, taamaalillutillu isumaqatigiinniarnerit aatsaat taama sivisutigaat.

Naalakkersuisoqatigiit ministerinngortussallu pingasunngornermi ilisaritinneqassapput.

Mette Frederiksenilli 2019-imiilli ministeriunertut suliinnarnissaa qularutissaanngilaq. Taanna 2019-imili ministeriuneruvoq.

Mette Frederiksen Marienborgimiit, ministeriunerup atorfimminut atatillugu najugaqarfianit Lyngbymiittumit Odensemut, kunngikkormiunut kunngip umiarsuaani Dannebrogimiittunut, ataasinngormat unnukkut angallanneqarpoq.

- Sivisuumik isumaqatigiinniareerluta naalakkersuisoqatigiittoqarsinnaanngornera nalunaarutigaara, Mette Frederiksen kunngi Frederik pulaareerlugu tusagassiortunut oqarpoq.

- Danmarkimi naalakkersuisut toqqammavissaat inunnut Danmarkimiittunut, kinguaariinnut tulliuttunut - aamma uumasunut pitsaasuuvoq, taanna nangilluni oqarpoq.

Enhedslistenimit tapersersorneqartut

Kunngikkormiut tusagassiuutinut ataasinngornermi unnukkut nalunaarutaanni allassimavoq, naalakkersuisunngortut Folketingimi amerlanerussuteqartunit tapersersorneqartut, kikkulli inatsisartuni tunngaviliinersut oqaatigineqanngilaq.

Socialdemokratiet, SF, Moderaterne aamma De Radikale katillugit 82-inik ilaasortaatitaqarput.

Taamaattumik partiit amerlanerussuteqartut akerlilersorumanagit, assersuutigalugu Enhedslistenip ilaasortaatitaanit aqqanilinnit, tapersersorneqartariaqarput.

Enhedslistenip gruppiani siulittaasup, Peder Hvelplundip, oqarnera naapertorlugu, Enhedslisten naalakkersuisoqatigiinngortussanut inatsisartuni tunngaviliivoq.

- Inatsisartuni kiffaanngissuseqarlutalu attuumassuteqanngitsuujumavugut, aamma isumaqatiginngisatsinnik akerlilersuisinnaajumaarpugut. Anguniagarli tamakkiisumik isigalugu isumaqataaffigaarput politikkikkullu malunnaatilimmik sunniuteqarpugut, Hvelplund P4 Nordjyllandimut marlunngornermi ullaakkut oqarpoq.

Partii Alternativet aamma naalakkersuisoqatigiinnissamik isumaqatiginninniarnernut naggatissaa tikillugu peqataavoq, naalakkersuisullu inatsisartuni tunngavileeqataanissaa naatsorsuutigineqarpoq. Partii taanna tallimanik ilaasortaatitaqarpoq.

Naalakkersuisoqatigiilernissamut isumaqatigiinniarnerit aatsaat taamak sivisutigaat kunngimullu katillugit pingasoriarluni nalunaaruteqartoqarpoq. Venstrep siulittaasua Troels Lund Poulsen Isumaqatigiinniarnerit pineranni, kunngikkormiut sinnerlugit sapaatit-akunnerani marlunni misissuisuuvoq, VLAK-illi naalakkersuisoqatigiilernissaannut tapersersuisut ikippallaarput.

/ritzau/