Danskit Amerikamiullu sakkutuuisa timmisartui nunatsinni sungiusartut
Danskit sakkutuuisa timmisartui F-35-t marluk nunatsinni Kangerlussuarmi mittarfimmut aatsaat siullermeertumik mipput.
Illersornissaqarfik pisortatigoortumik nittartakkamini nutaarsiassiinermini taama paasissutissiivoq.
Danskit sakkutuuisa timmisartuisa Amerikamiut sakkutuuisa timmisartuat F-16 aamma Canadamiut timmisartuat F-18 nunatsinni sungiusaqatigai.
Nunatsinni sungiusarneq illersornissaqarnikkut iligiit Issittumi najuunnerannik, nakkutilliinerannik suliaqarnerannillu pitsanngorsaataasussamut, Natop sakkutooqarnikkut nakkutilliinermut aarlerisaarinermullu suliniutaanut, Arctic Sentrymut ilaavoq.
- Issittumi pissutsit immikkut ittuusut, F-35-ni timmisartumik aquttoq Illersornissaqarfiup nittartagaani oqarpoq.
- Sila sakkortusinnaallunilu allanngorarsinnaavoq, missiusinnaasullu imminnut ungasipput. Taamaammat sungiusarnerit pilersaarusiornissaannut maanilu suliaqarnermini aarlerinarsinnaasunik isumaginninnissamut piffissamik atuingaatsiarpugut.
Illersornissaqarfiup sungiusarneq nunat arlallit timmisartunik ataatsimoortumik suliaqarnermut ilaasutut nassuiaatigaa.
Sungiusarnermi franskit silaannakkut orsersuisartuat, danskit nakkutilliinermi timmisartuat "timmisartumi aquttut ilaat ajornartorsiulissagaluarpat" ikiuussinnaasoq kiisalu Natop timmisartuat, Awacs silaannarmi radareqarfiusoq peqataapput.
- Timmisartorpassuit nunanit assigiinngitsuneersut sakkutooqarfinniillu ungasissuneersut ataatsimut suliniuteqarsinnaaneranni piginnaasagut tunngaviusumik sungiusarpagut, F-35-mi aquttoq oqarpoq.
- Suliaqarnerup taama ittup isumannaatsumik pilersaarummillu malinnittumik naammassineqarnissaanut assigiinngitsorpassuit ataqatigiissaarneqartarput.
Natop sungiusarneq "Arctic Sentry" USA-p præsidentiata, Donald Trumpip Kalaallit Nunaannik piginnittuunissaminik piumasaqaateqarnerata kingunerisaanik aaqqiagiinnginnerit ilungersunartut pillugit pilersippaa.
Amerikamiut præsidentiata Danmark Ruslandimit Kinamiillu aarlerinartoqarnerani Kalaallit Nunaata sillimaniarneranut atatillugu naammattumik iliuuseqarsimanngitsutut aamma isornartorsiorpaa.
RITZAU
