Inatsisartunut qinersinissamut ullualuinnanngortut Danmarkimi Det Konservative Folkepartimeersoq, Rasmus Jarlov qinersisoqarnissaanut oqallinnermut akuliuppoq.

Folketingimut ilaasortap Kalaallit Nunaata namminiilivinnissaanut qanoq isiginninnini YouTubekkut pingasunngornermi marsip tallimaani saqqummiuppaa.

Taassuma videoliaq KNR-ip nutaarsiassaqartitsiviata Facebookimi qupperneratigut aamma siammarterpaa. Video danskisut oqaasertaqarpoq, kalaallisulli allagartalersugaalluni.

Rasmus Jarlovip Kalaallit Nunaata namminiilivinnissaa aningaasaqarneq eqqarsaatigalugu isumassaqanngissoraa. Kalaallit Nunaalli Naalagaaffeqatigiinniiginnarniarpat aningaasanik amerlanerusunik namminerlu aalajangiisinnaanerunermik neriorsuuteqarpoq.

Taassuma oqarnera naapertorlugu namminiilivittoqassappat naalagaaffimmit tapiissutit ullormit siullermit unitsinneqassapput, kajumissutsimillu kattuttoqarnissaanut isumaqatigiissuteqarnissaq periarfissaanaviarnani.

Tamatuma saniatigut pisinnaatitaaffippaaluit kalaallit namminiilivikkaluarunik annaasinnaasai erseqqissaatigai. Ilaatigut kræftimik napparsimasut Rigshospitalimi katsorsarneqarnerat aamma killeqanngitsumik Danmarkimiissinnaaneq.

Rasmus Jarlov sooruna namminersorneq pillugu inatsimmi naalagaaffinngorneq namminiilivinnerlu isumaqatigiinniarnernit aalajangerneqassasoq allassimappat uku kingunerisinnaagai oqaatigaagit?

- Kalaallit Nunaat nammineq nunanngussasoq taamaalillunilu Danmarkimut nunatut allamiunngussaaq, taamaammat pisinnaatitaaffiit uku kalaallit ullumikkut danskisut innuttaassuseqarnerminni pisinnaasaat piuneerutissapput. Danmarkimut assersuutigalugu Danmarkimiissinnaatitaaneq ullumikkut killeqanngitsumik atuutereersoq pisinnaatitaaffigiinnarneqarnissaa isumaqatigiinniutigineqarsinnaavoq. Kisianni piginnaatitaaffiit uku tunniukkusunneqarnersut Danmarkip aalajangigassarissavaa.

- Tunissutissiassarpassuaqarnissaa, tassa Danmark pissarsiaqarnani Kalaallit Nunaannilu pisinnaatitaaffeqarnani tunniussarpassuaqaannarsinnaanissaa naatsorsuutigineqarsinnaanngilaq, Rasmus Jarlov oqarpoq.

Kisianni uku piviusutut saqqummiuppatit. Konservativet uku isumarigaat sooruna erseqqisaatiginngikkit?

- Piviusoq imaappoq Danmarkimi pisinnaatitaaffiit tamarmik, Danmarkimit tapiissutit tamarmik Kalaallit Nunaata Danmarkimit aninerani piuneerutissapput. Danmarkimut isumaqatigiinniuteqartoqarsinnaavoq – immaqa. Kisianni tamanna Kalaallit Nunaata pisinnaatitaaffigissanngilaa.

- Danmark pissarsiaqarani akeqanngitsumik tunniussuinissaa pilersaarusiorneqarani piviusoq eqqarsaatigisariaqarparput, folketingimut ilaasortaq oqarpoq.

Periuseq kukkunerusoq

Danskit partiivisa nunatsinni qinersinermut akuliuttannginnerat ileqquuvoq.

Taamaakkaluartorli Rasmus Jarlovip namminiilivinnissap oqallisigineqarneranut akuliunnissaq pisariaqarsoraa, taassuma oqarnera naapertorlugu Kalaallit Nunaanni "Danmarkimit pisinnaasarpassuit qulakkeerneqarsimasutut" isigineqarput.

- Politikkikkut aalajangiinerup pisinnaatitaaffiginngisanik pisinnaatitaaffippassuaqarnissaa pillugu kukkusumik eqqunngitsumillu paasinninnermik tunngaveqarani piviusorsiortumik tunngaveqarnissaa pingaaruteqarluinnarpoq, taanna oqarpoq.

Politikerit nunani allani qineqqusaartoqarneranut akuliuttarnerat nalinginnaasumik ileqquunngilaq. Soorli taamaaliorlutik una videoliariviuk?

- Danskit tungaanniit oqallinnermut peqataannginnissarput iluaqutaassanngitsoq isumaqarpunga. Danskit politikerit amerlanerit kalaallinut akerliugunik kamatsitsinissartik ernumagalugu oqaaseqanngitsut ilisimavara. Kisianni tamanna periuseq kukkunerusoq isumaqarpunga.

- Isumaqarpunga oqaloqatigiilluta pissutsit qanoq inneratut oqaatigalugit immitsinnut atassuteqarfigisariaqartugut, Rasmus Jarlov oqarpoq.

Konservative Folkeparti Folketingimi ilaasortanit 179-init 10-nik ilaasortaatitaqarput, naalakkersuisunullu ilaanatik.