Dansk Folkepartiip sakkutuut 100-t sakkulerlugit nunatsinnut aallartinniarai
Dansk Folkepartiip danskit sakkutuui 100-t sakkunik missilinillu umiarsuarnut Kalaallit Nunaannukaartunut atorneqarsinnaasunik atortorissaaruserlugit aallartinniarpai.
DR taama allaaserisaqarpoq.
Dansk Folkepartiip tamatuma saniatigut nunami illersuisussat nutaat pilersikkusullugillu sakkutuujusussaatitaaneq nunatsinni atuutilersikkusuppaa.
- Kunngeqarfimmut illersuinitta takussutisserneqarnissaa pisariaqarpoq, aamma kalaallit akisussaaffimmik annerusumik tigusillutik kunngeqarfimmik illersueqataanissaat pillugu akuliutinneqarnissaat pisariaqartinneqarpoq, DF-ip Kalaallit Nunaannut illersornissamullu tunngasunut oqaaseqartartua, Alex Ahrendtsen DR-imut oqarpoq.
Siusinnerusumi siunnersuutaasimasoq
Nunatsinni sakkutuujusussaatitaasoqalernissaa DF-ip siusinnerusukkut siunnersuutiginikuuaa. Maanna piffissanngortoq, Alex Ahrendtsen isumaqarpoq.
Angutit arnallu nunatsinni aalajangersimasumik najugaqartut illersornissamut pisinnaatitaaffeqarput, sakkutuujusussaatitaanatillu. Tassa imaappoq nammineq kajumissusertik atorlugu Danmarkimi sakkutuujusussaatitaasinnaapput.
Nunatsinni sakkutuujusussaatitaanerup atuutilersinneqarnissaa DF-ip siusinnerusukkut siunnersuutigimmagu tamanna itigartitsissutigineqarnikuuvoq. Nunatsinni naalakkersuisut siulittaasuat, Jens-Frederik Nielsen tamatumuuna aamma itigartitserpasippoq.
Taassuma tunngaviusumik ilinniarfiup kalaallinut sakkutuut imarsiortuini, timmisartortartuini sorsuttartuiniluunniit ilinniarnissamut periarfissiisup allilerneqarnissaa kissaatigaa. Taassuma tamanna DR-imut oqaatigaa.
Socialdemokraatit illersornissamut oqaaseqartartuata, Simon Kollerupip Dansk Folkepartip Kalaallit Nunaanni sakkutuujusussaatitaanermik atuutilersitsinissamut siunnersuutaa DR-imut aamma itigartitsissutigaa.
Kangerlussuarmi ilinniarfik
Issittumi Tunngaviusumik Ilinniarfik nunatsinni najugaqartunut inuusuttunut ilinniarfiuvoq. Atuartut siulliit 22-t 2024-mi maajimi ilinniarnerminnik aallartitsipput.
Tunngaviusumik ilinniarfik qaammatinik arfinilinnik sivisussuseqartoq eqqarsaatersuuteqarnissamut ingerlatsinermut annertusillugu qaammatinut aqqaneq-marlunnut sivitsorneqarsinnaavoq.
Ilinniarfik pingaartumik Kangerlussuarmi ingerlanneqartarpoq.
Partiit illersornissamut isumaqatigiissusiortut Issittumut Atlantikullu avannaanut suliniutinut nutaanut 14,6 milliardit koruunit atorneqarnissaat januaarimi isumaqatigiissutigaat.
Issittumi umiarsuarnik nutaanik pingasunik, timmisartuaqqanik ungasianiit aqunneqarsinnaasunik pitsaasunik assiliisinnaasuseqartunik pilersitsineq aamma qaammataasatigut piginnaasanik pitsanngorsaanermut ilaatigut tunngassuteqarput.
Tamatuma saniatigut Issittumi Tunngaviusumik Ilinniarfimmi ilinnialertussatut amerlineqarnissaat aamma isumaqatigiissutigineqarpoq.
Partiit issittumi sorsutsitsinnginniarnissamik illersuinissamillu ukkataqartumik kingusinnerusukkut 2025-mi isumaqatigiissutip ilaatut isumaqatigiissusioqqinnissaat siunertarineqarpoq. Illersornissamut ministereqarfiup tamanna januaarimi allappaa.
