Ruslandip Ukrainemut saassussinini unitsinnavianngikkaa danskit naalakkersuisui isumaqarput. Taamaammat danskit naalakkersuisui akeqqanut aamma Danmarkimut ungasissumut qunusaarutissanik sakkunik maanna pisiniarput.

Danskit naalakkersuisui ”sillimaniarnermut pissutsit malitsigisaanik illersornissamut suliniuteqarneq” pillugu naatsumik tusagassiortunut ullaaq manna katersortitsineranni tamanna oqaatigineqarpoq.

Danskit ministeriunerat, Mette Frederiksen, illersornissamut ministeri Troels Lund Poulsen aamma nunanut allanut ministeri, Lars Løkke Rasmussen tusagassiortunik katersortitsisuupput.

Taakku sakkunik nakerluinnartunik ungasissumut igeriuttakkanik – assersuutigalugu missilinik timmisartuaqqanillu inuttaqanngitsunik pisinissamut 'tunngaviusumik aalajangerneq' saqqummiuppaat.

Naallu Danmarkimut siooranartoqanngikkaluartoq Mette Frederiksen arlaleriarluni erseqqissaavoq.

- Tutsuiginartumik pakkersimaarsinnaasariaqarpugut, sorsuttoqannginnissaanullu aningaasaliissuteqartugut erseqqissassallugu pingaaruteqarpoq, ministeriuneq oqarpoq.

'Eqqarsartaatsimik allannguineq'

Aalajangiineq danskit illersornissaqarneranni eqqarsartaatsimik allannguineruvoq. Allannguineq Danmarkip illersornissaanut NATO-mullu naammattumik tapersiissuteqarnissamut pisariaqartoq, ministerit pingasut erseqqissaatigaat.

- Silaannakkut illersornissaqarneq naammanngilaq, Mette Frederiksen oqarpoq.

- Iliuuseqarnerunissamut kajumissuseqarnermik ersersitsisoqartariaqarpoq.

Danskit naalakkersuisuisa Danmarkip – illersuinnarani saassussisinnaanissaanut sakkunik taakkuninnga pisisinnaanissamut periarfissat misissuleruttorpaat. Sakkut qanoq akeqassanersut, sumi inissisimassanersut Issittumilu illersornissamut qanoq isumaqassanersut ullumi tusagassiortunik katersortitsinermi erseqqissarneqanngilaq.

KNR-ip aalajangiineq nunatsinnut Issittumullu qanoq isumaqassanersoq akissutissarsiniarlugu illersornissamut ministereqarfik attaveqarfigaa.