Danmarki Nunatsinni upalungaarsimanermut 180 millionit koruuninik aningaasaliisoq

Danskit naalakkersuisuisa upalungaarsimanermi suliassaqarfinnut pinasuartumik aningaasaliinerit nutaat, Danmarkimi tusagassiortunut sassarnerminni tamanut saqqummiuppaat.

Isumaqatigiissulli Atlantikup illuinnaanut atuutissanngilaq, Nunatsinnuttaaq iluaqutaassaaq.

Pinasuartumik aningaasaliinerit ataatsimut 1,2 milliardit koruuniupput, qajannarsinnaasunut kissaatiginngisamilluunniit pisoqaratarsinnaanissaanut akiuunnissamut, killiliinissamut pisinnaasanik pitsanngorsaanermut piffissamut qaninnerusumut iluaqutaassallutik.

Inuiaqatigiinni sillimaniarnermut Upalungaarsimanermullu Ministeriaqarfimmiit paasissutissat tutsuiginartut takutippaat.

Aningaasanit taakkunannga Nunatsinni upalungaarsimanermut suliniutinut 180 millionit koruunit atugassianngortinneqarput.

Assartuineq nukissiuutillu 

180 millionit koruunit taakku sumorpiaq atorneqarnissaat iluamik takussutissaqanngilaq.

Ministerialli Kalaallit Nunaat pillugu oqaluuserisassaanni allaqqavoq:

- Upalungaarsimanermut suliassaqarfinni aamma assartuinermi nukissiuutinullu suliassaqarfinni upalungaarsimanermut suliniutinut suleqatigiinnerup pitsaanerulernissaa. 

Upalungaarsimanerni eqimattanik ataqatigiissaarisoqartoq, Múte B. Egedep (IA) tusagassiortunut sassarnermi januaarip 20-anni tamanut saqqummiuppaa.

Tassani attaveqaqatigiinnerup pitsanngorsarneqarnissaa innaallagissamillu qamittoornerit pinngitsoortinneqarnissaannut pisortat suleqatigiittut erseqqissaatigaa.

Upalungaarsimanermut siunnersuutit

Tusagassiortunut  januaarimi aqaguani sassarnermi Peter Borg (D), Aqqaluaq B. Egede (IA), Aalisarnermut, Piniarnermut, Nunalerinermut Imminullu Pilersornermut Naalakkersuisoq aamma Isumaginninnermut, Suliffeqarnermut, Ineqarnermut, Attaveqaasersuutinut, Isorliunerusunullu Naalakkersuisoq takkupput. 

Innuttaasut ajornartoorfinni piareersarsimanissaminnut inuttut akisussaaffeqartuttaaq, kingullertut taaneqartumit oqaatigineqarpoq.

Atortorissaarutit nutaaliaasut atunngikkaluarlugit kalaallit anersaavattut taallugu tamanna anigorneqarsinnaasoq Aqqaluaq B. Egede oqarpoq.

- Taamaattumik immitsinnut paarissaagut pisortallu iliuuseqarnissaat utaqqiinnarnagu. Immitsinnut ikiorsinnaasariaqarpugut, inoqutigiit piareersarluarnerisigut taamaaliorsinnaavugut, Aqqaluaq B. Egede tusagassiortunut sassarnermi qaammat kingulleq taamak oqarpoq.

Naalakkersuisut tusagassiortunut sassarnermi naqitamik paasissutissiamik siunnersuutinik imaqartumik tamanut saqqummiussipput, taaguuserlugu: ‘Ajornartoornermut piareersarneq – ullut tallimat ingerlanerini napatinnissannut piareersarit’.