Danmark issittoq pillugu nutaamik aallartitaqalerpoq

Erik Vilstrup Lorenzenip issittoq pillugu aallartitatut Klavs A. Holm taarserpaa. Angut issittumi pissutsinik ilisimalik atorfinippoq. Erik Vilstrup Lorenzen Canadami naalagaaffiup aallartitaatut siornatigut atorfeqarsimavoq.
Allattoq Peter Troelsen, Simon Uldum
januaarip 10-at 2013 06:20

Issittumi Siunnersuisooqatigiinni siulittaasuuffik Canadap tigungajalerpaa, taamaammat aallartitanngortussaq susassaqarfimmi pissutsinik ilisimasaqarluarluni atorfittaamini aallartissaaq. Canadap  piffissami sivisuumi issittumi pissutsit annertuumik sammisimavai.

Klavs Holm issittoq pillugu aallartitatut atorfini qimallugu OECD-mi aallartitatut sulilertussaq, issittoq pillugu aallartitatut aallartikkami issittoq pillugu ilisimasaqarpallaanngilaq, Danmarkilli Issittumut tunngatillugu soqutigisaminik isumaginnittussamik misilittagartuumik aallartitaqarnissani maanna qulakkeerpaa.

Erik Vilstrup Lorenzen, 51-inik ukioqarpoq, cand. scient. pol-itut ilinniagaqarluni  Danmarkimilu nunanut allanut ministeriaqarfimmi 1991-imiilli atorfeqarsimalluni.

- Issittoq pillugu aallartitartaassap Canadami naalagaaffiup aallartitaatut atorfeqarsimanermigut Issittoq pillugu ilisimasaqarluarnera nuannaarutigaarput. Claus Holm pitsaasumik ammasumillu attaveqarfigisimavarput, Erik Vilstrup Lorenzenillu aamma taamatut suleqatiginissaa qilanaaralutigu, Verdensnaturfondenimi WWF-imi allattaaneq Gitte Seebergimi oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk