Arfeq illaalik 22 kilomik plastikkimik naarmioqarluni toqungasoq

Nutaarsiassaqartitsivik skynews.com allappoq. Arferup naavata iluani ilaatigut puussiat, puugutat plastikkit, aalisakkanut qassutit errorsinermut qaqorsaatit puuat, illaavalu toqungasoq, nassaarineqarput.

Kattuffiup naalakkersuinermut attuumassuteqanngitsup SeaMep kigutilissuaq naammattoorpaa ilisimatuunillu suleqarteqarluni pilattarneratigut susimanera misissorpaat.

Nunarsuarmi immap plastikkeqarnerujussua ajornartorsiutaangaatsiartoq, kattuffimmi SeaMe-mi siulittaasoq Luca Bottau Skynewimut oqarpoq.

- Immaami plastikkinik puttasunik piiaagaluarluta, kivinikut qanoq iliorsinnaanngilagut. Periuserput atueriaaserpullu allanngortittariaqarparput, assersuutigalugu qisunnik atuinerulersinnaavugu, Luca Bottai oqarpoq.

Kigutilissuaq Italiap qeqertaani tippussaasimasoq 6 miiterisut takissuseqarpoq.

Italiami avatangiisinut ministeri Sergio Costa maanna suliamut ilannguttoq Facebookkimut allappoq.

- Eqqakkat immamiittut nunarsuarmut tamarmut Italiamuunaanngitsoq sunniuteqartarput, taamaammat nunarsuaq tamakkerlugu pisussaaffeqarpoq tassunga tunngasumik politikkiliussalluni, taanna allappoq.

Plastikkinik ataasiartakkanik EU-mi 2021-imi inerteqquteqalissaaq, Italiami avatangiisinut ministeri neriorsuivoq nunat siullerpaat ilagalugit inerteqqut atuutilersissallugu.

Marsimi Filippinerini arfeq 40 kilonik plastikkinik naarmioqartoq siumorneqaqqaarpoq, juunimilu Thailandimi aamma arfeq toqungasoq tippussaasimavoq, taanna puussianik 80-inik naarmioqarnini aamma toqqutigaa.