Czech Openimi nunatsinniit peqataasoqartoq
Taekwon-Do-mi nunanut allanut unammisartut nunatsinneersut Tjekkiemut unammiartorput.
Czech Open nunatsinniit aatsaavissuaq peqataaffigineqarpoq.
Allattoq Steve Pedersen Hinrup
marsip 08-at 2026 09:43
Czech Open Tjekkietimi ukiut tamaasa ingerlanneqartarpoq, europamilu unammisartut pitsaanerit takkussuuffigisarlugu.
Nunanut allanut unammisartut nunatsinneersut Europami pissartanngorniunnissami apriilip naajartornerani ingerlanneqartussami, peqataanissaminnut piareersaatitut Chezh Open peqataaffigissavaat.
Kalaallit Taekwon-Dortartut peqatigiiffiat tusagassiuutinut taama nalunaarpoq.
Inukkuluk G. Lennert, Angutinnguaq J. Nielsen, Arnaaluk Frederiksen kiisalu Maasi E. Davidsen nunanut allanut unammisartutut peqataapput.
Nunatsinneersut qanoq piareersarluarsimatiginersut, nunanut allanut unammisartuni sungiusaasoq, Louis Nielsen aperigatsigu ima akivoq:
- Piareersarluarnikuupput. Frikampertussaq aamma nutaanik misileraanikuuvoq periuutsinik allanik, taanna oqarpoq.
- Neriuppugut ujamminik angerlaassisoqarsinnaassasoq, taannami aamma siunnerfigivarput. Czech Openimut peqataasartut nunaninngaanniit allaneersut unammiartorfigisarpaat, taamaammat ujaminnanniassagunik unammillertussarujussuupput, Louis Nielsen oqarpoq.
Taekwon-Dortartut nunarsuarmi pitsaanerpaanut unammiartorusunnerusartut, taamaalillutik nunarsuarmi europamilu pissartanngorniunnissamut piareersarnerusartut, Louis Nielsenip oqaatigaa:
- VM-imi EM-imilu unammisartut takkussuuffigisartagaannut unammiartorusunnerusaratta, unamminerit sakkortunerusarput. Unamminerit sakkortussusai EM-imut VM-imullu qaninnerusarmata, taanna oqarpoq.
Nunanit allaneersunik unammisaqarnissaq, Taekwondortartut nunanut allanut unammisartuisa sungiusaasuata, Louis Nielsenip pingaaruteqarnerarpaa:
- Nunatsinni imminnut unammisaqattaaginnarunik allanillu unammillissanatik, taanna alloriarfiuallaarneq ajorami. Taamaasilluta sukkut sanngiiffeqarnerluta, imaluunniit sukkut nukittuffeqarnerluta paasisarparput. Unammisartut allat ilikkagaqarfigilluartarpagut, taanna oqarpoq.
Czech Open matumani saatip akunnerata naanerani ingerlanneqarpoq, Arctic Winter Gamesittaaq aallartiffiani.
