Canadami ikuallattoqarneranit pujoq sermitta aakkiartorneranut sukkanerulersitsisinnaava?
Amerikamiut ilisimatuui sapaatip akunnerata naanerani Kalaallit Nunaata kitaata sineriaanut tikipput, qanoq pujoralaat qernetumik qalipaateqartut – soorlu paaq – sermersuup aakkiartorneranut sukkatsitsinersut misissoriartorlugit.
Aviisi amerikamiut atuagassiaat Cascadia Daily News-i tamakku pillugit allaaserinnippoq.
Sermeq qernertoq sukkanerujussuarmik aakkiartortarpoq
Misissuiartortut ilisimatuumik Western Washington University-meersumit Alia Khan-imik siulersorteqarput, ilisimatusartullu ulluni aqqaneq marlunni Kalaallit Nunaanni sermersuarmiissallutik pilersaaruteqarput.
Seqernup qinngornera pujoralannit qernertunit qanoq tigoorarneqartigisoq, Droninik malinnaaviginninnernik sermimillu misissuinerit atorlugit misissussavaat - taamaalillutillu sermip aakkiartorneranut qanoq sunniuteqarnersut uuttortarneqassallutik.
Aputip qaa qernertoq, seqernup qinngorneranik tigooqqaanerusarpoq, qaamasunilli – soorlu sermeq – seqerngup qinngornera utertinneqartarpoq.
Taamaammat sermeq pujoralannit qernertunit qallerneqartoq kiannerulersarpoq, sukkannerusumillu aakkiartorluni.
Pujoralaalli soorlu qernertumik qalipaateqartut orpippassuarni ikuallannerneersuusinnaapput, soorlu Canadami maanna annertuumik ikuallattoqarnera ingerlasoq, pujoralaallu Atlantikup avannaani Kalaallit Nunaannut apuunneqaratarsinnaapput – taamaalullutillu sermimut qaqinnissinnaallutik.
Kalaallit Nunaata sermersua annikilliartorpoq
Kalaallit Nunaanni sermeq aakkiartortoq, nunarsuarmi immap ulimukarnerulerneranut malunniuteqarnerpaajuvoq.
Taamaattumik Kalaallit Nunaanni sermeq aakkiartortoq, nunarsuup sinnerani sineriannut tamanut sunniuteqassaaq, Alia Khan Cascadia Daily News-imut oqarpoq.
Ukiuni kingullerni 80 gigatonitut annertussusilimmik sermeq aakkiartorsimasoq, GEUS-ip misissuineranit takutinneqarpoq.
Pujoralaat qernertut qanoq sermip aakkiartorneranut sunniuteqartarnerinik misissuinermit inernerit, silap pissusiata allanngorneranik eqqornerusumik paasiniaanermut iluaqutaassapput. Tamanna silap pissusaa pillugu maanna atorneqartartunut ilusilersukkanut pitsaanerusumik naatsorsuinissamut iluaqutaassaaq – taamaalillunilu immap siunissami qanoq sukkatigisumik qaffassinnaaneranut erseqqissumik takussutissiinerulersinnaalluni.
