Brugsenip imeruersaatinik kofferineqartorujussuarnik pisissussat ukiui killilerpai

Imeruersaatit eqeersaammik koffeinimik akusarujussuit meeqqanut 16-init inorlugit ukiulinnut Brugsenip pisiniarfiini pisiarineqarsinnaanissaat inerteqqutaalissapput.  

Nioqqutissanik pisiniarfik tusagassiuutinut nalunaarummi taama allappoq.  

- Meeqqat inuusuttullu imeruersaatinik koffeinimik akusanik killilimmik imertarnissaat peqqinnissaqarfimmit innersuussutigineqartoq tunngavigalugu aalajangiinerusoq, tusagassiuutinut nalunaarummi allassimavoq:

Inuussutissat pillugit aqutsisoqarfiup, fødevarestyrelsenip, innersuussutiginngilaa meeqqat eqeersaatitalinnik imeruersaatitortarnissaat, imeruersaatit koffeineqarpallaartut ilaatigut timimut eqqissisimatitsineq ajormata, sinissaarutsitsisarmata, ukkatarinninnissamut akornutaasarmata aamma uummammik kassutitsisarmata. 

Pisinissamut 16-ileereersimanissamik aalajangiineq aggustip 17-ianni atuutilissaaq, ullorlu taanna meeqqat feeriareerlutik atuariartoqqissapput.

Brugsenip erseqqissaatiginngilaa imeruersaatit qanoq atsigisumik koffeinillit 16-ilereersimasunit pisiarineqarsinnaanersut. 

Brugseni allappoq sodavandinik saftimilluunniit, aamma koffeineqarsinnaagaluartunik,  pisiniartut ukiui matumani pineqanngimmata. 

Nalunngilarput imeruersaatit koffeineqartorujussuit meeqqannut innersuunneqarneq ajormata. Taamaattumik kissaatigaarput aamma inuusuttut kajumissaarpagut pisiassanik ulluinnarni peqqinnarnerusunik pisisaqqullugit, pisiniarnerminni angajoqqaatik ilaginngikkaluarlugit, brugsenimi pisortaaneq Allan Kristoffersen oqarpoq:

- Imeruersaatinik koffeinitalinnut pisinissamut ukiunik killeqartitsineq kisimi aaqqiissutigineqartussatut isigisassaanngilaq, taannali meeqqat inuusuttullu peqqinnarnerusumik inuunissaannut aaqqeeqataatitsisuuvoq.