Kangaatsiap atuarfia: Borgmesteri maanna oqaaseqartoq

Suliat Kangaatsiamut tunngasut Kommune Qeqertalimmit pimoorunneqarnerat, Borgmesterip Simigaq Heilmannip (D) oqaatigaa.

Allattoq Paarnannguaq Nielsen, Markus Valentin

maajip 15-at 2026 07:30

Nutserisoq Medea Olsen

Oqartussaasut akisussaaffitsik naammaginartumik isumaginngilaat.

Kangaatsiap Atuarfiani atuartut angajoqqaavi suliami meeqqanik innarliisoqartarsimaneraanermut tunngasumi angajoqqaat taama isornartorsiuipput.

Kommune Qeqertalimmi borgmesteri Simigaq Heilmann (D) oqarpoq, suliat innarliinermut tunngasut pimoorulluinnarlugit.

- Kommunitsinni pissutsit taamaattut akuerinngilagut. Taamatut pisoqartussaanngilaq tamattalu kialluunniit taamatut misigisaqannginnissaa kissaatigaarput. Taamaattumik taamatut pisoqartillugu, suliat pimoorullugit ilungersuunneqartarput.

Naammagittaalliortulli oqartussaasut naammaginartumik iliuuseqarsorinagit misigisimanera paasisinnaavaa.

- Naammagittaalliortutut taamatut misiginarsinnaasarpoq, inunnut ataasiakkaanut tunngasut oqaatigineq ajoratsigit. Taamaattoqartariaqarami. Sulialli taamaattut pimoorunneqartarput ilungersuunneqarlutillu, borgmesteri oqarpoq.

- Taamatut misigisimasoqarpat tamanna soorunami ajuusaarnarpoq, kommunili maleruartariaqakkanik pisussaaffeqarlunilu malittarisassaqarpoq. Inerneri inunnut paasissutissanik imaqarmata oqaluttuarinavianngilagut. Sulialli suliarineqarput.

Tamanna pissutigalugu borgmesteri Kangaatsiami pisut pillugit toqqaannartumik oqaaseqarsinnaanngilaq.

Kommunilli suliat qanoq iliuuseqarfiginerai kommunilu taama pisoqaqqinnginnissaa qulakkeerniarlugu qanoq iliuuseqarnersoq oqaluttuarisinnaavaa.

KNR ukkatarinnittoq: Kangaatsiap Atuarfia Iparartarfik

KNR-ip meeqqanut killissamik qaangiisumik pissusilersuutit, kinguaassiuutitigut naapertuilluannginnerit nakuusernerillu pillugit oqaluttuat arlallit piffissami tulliuttumi saqqummiutissavai.

Oqaluttuat tamarmik Kangaatsiap Atuarfiani Iparartarfimmi angajoqqaanit meeqqaniillu oqaluttuarineqarput.

Illit imaluunniit nalunngisavit arlaat meeqqat atuarfianni assingusumik nalaataqarsimaguit redaktion@knr.gl-imut attaveqarnissannut tikilluaqqusaavutit.

Kisimiittutut misigisimaguit oqaloqateqarnissannillu pisariaqartitsiguit Tusaanngamut attaveqarsinnaajuaannarputit.

Oqarasuaatikkut siunnersuisarneq tassaavoq kinaassutsimik isertuussilluni illit siunnersuisullu akornassinni inuttut oqaloqatigiinneq, tassani oqaloqatigiinnerup imaa illit aalajangissavat.

Meeqqat, inuusuttut inersimasullu tamarmik oqaloqateqarnissamik allaqateqarnissamilluunniit pisariaqartitsisut Tusaannga attavigisinnaavaat. Tusaanngamut attaveqarneq kinaassutsimik isertuussisinnaaffiuutigaluni akeqanngilaq – aamma Tusassit imaqanngikkaluarpalluunniit sianersinnaavutit.

Oqarasuaat: 80 11 80

SMS: 1899

Kommunemi misissuisoqartoq

Suliat pineqartut politiinut suliassanngortinneqareersut Simigaq Heilmann oqaluttuarpoq.

Kommunilli akisussaaffimminik naammassinninnissani qulakkeertussaavaa.

- Tamanna allaffissornikkut pisarpoq. Susoqarsimanera kikkullu pineqarnersut misissorneqartarpoq. Qanoq pisoqarsimanera misissorneqassaaq.

Simigaq Heilmannip pisussaasimanngitsunik pisoqarsimappat kikkut tamarmik nalunaarutiginninnissaminnik tunuarsimaannginnissaannik kajumissaarpai.

- Naapertuilluanngitsumik pineqarsorigaanni iliuuseqarnissaq pingaaruteqarpoq. Tamatta eqqortumik pineqartussaavugut.

Kommunip Kangaatsiami taamatut pisoqaqqinnginnissaa qanoq qulakkeerniarpaa?

- Naleqartitani pingaartitatsinni erseqqissumik ingerlariaaseqarnissaq soorunami pingaaruteqarpoq. Innuttaasut assingusumik pisoqartillugu qanoq iliornissartik nalornissutigissanngilaat. Tamatuma erseqqissuunissaa isumaqarpunga aalajangiisuussasoq.

Simigaq Heilmann aamma oqaluttuarpoq, kommunip inuit Kangaatsiami pisimanerarneqartutut misigisallit ikiussallugit pisussaaffigigai.

Kangaatsiami sulisussarsiortut

Kommuni ilaqutariinnik sakkortuumik misigisaqarsimasunik ikiorsiigaangat, ikiorneqartut najukkaminni ilaqutariinnut sullissivimmut saaffiginnissinnaapput.

- Oqaloqatigineqarnissaminnut neqeroorfigineqartarput, tamatumalu saniatigut pisariaqartitsisoqartitsippat ammasumik siunnersuisoqarsinnaavoq, Simigaq Heilmann oqaluttuarpoq.

Kangaatsiamili ilaqutariinnut sullissivik sulisussaaleqivoq.

- Maannakkorpiaq Kangaatsiami sulisussarsiorpugut. Kangaatsiami innuttaasut kommunitsinni illoqarfiit allat assigalugit namminneq illoqarfimminni taamatut periarfissaqalernissaat neriuutigaarput, borgmesteri oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.