Blok 17-imi ippassaammat ikuallattoqarnera pillugu politiit oqaaseqartut
Nuummi Qapiarfiusaami blok 17-imi ikuallattoqarneranik Kalaallit Nunaanni Politiit ippassaq nalunaaqutaq 11.49 kalerrinneqarput.
Politiit ingerlaannaq ornigussorput, taakkualu inissiani quleriit sisamaat ikuallattoq paasivaat.
Sillimasut pisortaat Poul Kreutzmann taama oqaluttuarpoq.
- Ikuallanneq qaminneqapallappoq, misissuisartugullu misissuitikkatsigit, taakkua kissarsuutip nalaa ikuallannerup aallartiffigigaa takusinnaavaat. Tamanna kissarsuutip imaluunniit atortorissaarutit elektroniskiusut ajoquteqarneranut ersiutaasinnaavoq.
Ikuallattoqarfimmut apuuteqqaartut ilaat KNR-imit ippassaq oqaloqatigineqarpoq.
Inissiami putsumik ulikkaartumi inoqarpalussimannginnera taassumap oqaluttuaraa.
Inissiap inoqarsimannginnera inunnillu ajoqusertoqarsimannginnera sillimasut pisortaata uppernarsarpaa.
Politiit pinerluttoqarsimaneranik takussutissaqannginnerarpaat najugaqartullu INI A/S-imit allamik maanna inissarsineqareerput.
Innuttaasut ikiuinissamut mianersoqquneqartut
Ikuallattoqarneranik takunneqqaartut ilaat inunnillu inissiarsuarmiit aneqqusilluni ikiuiniarsarisimasup oqaasii, KNR-ip ippassaq saqqummiuppai.
Ikiuiniarluni ajunngitsumik siunertaqartoqarnera paasilluarsinnaallugu, sillimasut pisortaata Poul Kreutzmannip oqaatigaa.
Taamaakkaluartoq ikuallattoqartillugu matu isimmillugu ilummut ammarnissaanut mianersoqqusivoq. Taamaaliorneq iluaqutaanani navianarnerusinnaammat, taanna oqarpoq.
- Allaat uagut politiit, qatserisartut pisortaannit matunik isimissilluta ammaaniartassanngitsugut peqquneqarpugut, taamaaliorutta qaartoortitsisinnaagatta. Inissiaq sivisunerulaamik ikuallassimasuuppat ajornerusumik kinguneqarsimasinnaagaluarpoq.
Taamaattumik qatserisartut pujorsiortartuisa tikiunnissaat utaqqineqartarnissaa sillimasut pisortaata kajumissaarutigaa.
- Soorunami inummik ikiorneqariaannarmik takusaqanngikkaanni.
