Biskopi: Oqaluffiit palasinik atorfinitsitsinissamut aningaasassaqanngillat

Palasissaaleqineq ajornartorsiutaajuarpoq. Naak politikerit ukiuni qulikkaani nikeraraluartut tamanna aaqqiissuteqarfigineqanngilaq.

Tamanna biskopip, Paneeraq Siegstad Munkip oqaatigaa.

- Tassa aningaasaliissutit iluanni atorfinitsitsisarnerit amerlassusilerneqartarput. Taanna biskopinngoramali eqqartortuarparput, Inatsisartunut kissaatigalugu ajornanngippat ilageeqarnermut aningaasaliissutit qaffannerisigut atorfeqartut ataavartumik amerlineqarnissaat kissaatigalutigu. 

- Taamaattumik uaniinnerugunarpoq aningaasaliissutit iluanni naammattusaarinerup aqqani ukiup sinneranut massakkut palaseqanngitsut arfiniliupput. Taakkua atorfinitsitsisoqanngikkallarnissaannut allaat killittarpugut aningaasat amigarmata. 

Aamma naak palasinik ilinniarsimasunik atorfinitsinneqarsinnaasoqaraluartoq.

- Palasinik sulinngitsunik nunatsinniittoqarpoq. Suli utoqqalinatik suliunnaarnikut. Taamaattumik aamma imaassinnaagaluarpoq palasinngortitsinissamut periarfissaqaraluartoq. 

Napparsimallutik sulinngitsut

Nunaqarfinni oqaluffiit kisimik palasissaaleqinngillat.

Illoqarfiit pingaarnersaanni aamma ajornartorsiutaavoq – Nuummimi innuttaasut amerlangaatsiarput.

- Nuummi inuit 20 tusindiutillugit palasit amerlassusaat apeqqusernarseqqagami peqqinnartumik sulisinnaassagunik, Paneeraq S. Munk oqarpoq.

- Sulisut ilaannikkut allatut ajornartumik napparsimasoqartarpoq, piffissap ilaanni ulapippallaarnerup kinguneranik. 

Nunatsinni palasitut atorfiit arfinillit maannakkut inuttaqannginnerarpai. Palasitut atuartitsineq nutaaq aappaagu aallartissaaq. Assi © : KNR / Markus Valentin

Ilinniartut amerlanerusut

Pastoralseminarip tullia 2027-mi ingerlanneqarpat palasinngorniartitsisoqassaaq.

Uanilu ukiup affaa ingerlareerpat palasitut ivertitsinissaq anguniagaavoq.

Oqaluffinnili palasit kisimik amigaataanngillat. Ajoqit aamma amigaatigineqarput.

Biskopip oqarnera naapertorlugu sipaarniarnerit ajornartorsiutaasumut pissutaaqataapput.

- Ajoqinngorniat holdit nutaat aallartitilerpagut, kitaaniittussat Sisimiuni ingerlassapput taava kangianiittussat Tasiilami atuartinneqarumaarput. 

- Tassa sapinngisamik aningaasaliissutit iluanni ilinniartitsinerit ingerlattarpagut, kisianni ukua ukiuni kingullerni sipaarniarnermik tunngaveqartumik pikkorissaanerit unittooqqasutut ipput.