BankNordik: Kommuneqarfik Sermersooq aningaasaliiffigineqaqqissanngippat ajornartorsiutinngorsinnaavoq
Tamannalu ajornartorsiutinngorsinnaasoq BankNordikip nunatsinni pisortaa Bjartur Nolsøe Jyllandspostenimut naliliivoq.
Kommuneqarfik Sermersooq 2.200-nik sulisulik Kalaallit Nunaanni sulisitsisuni annerpaavoq, kommuunilu sipaarniuteqartariaqassappat kiisalu Naalakkersuisut kommuunimut IA-meersumik borgmesterilimmut aningaasanik amerlanerusunik tapiissuteqarnianngippat ajornartorsiutinngorsinnaasoq, BankNordikip nunatsinni pisortaa Bjartur Nolsøe Jyllandspostenimut apersorneqarnermini oqarpoq.
Aamma oqarpoq Kalaallit Nunaanni aningaasaliiffigineqarsinnaasunik amigaateqartoqanngitsoq, aallartitsisoqassappalli aningaasat atugassat pissarsiarineqaqqaartariaqartut. Kalaallit Nunaanni pisortat suliffeqarfinnik tigummisaqarnerat taama annertutigitillugu aningaasat pissarsiarinissaat ajornaatsuinnaanavianngitsoq aammali ajornartorsiutinngorsinnaasoq Bjartur Nolsøe isumaqarpoq.
- Kommuneqarfik Sermersooq sipaarniarluni sulisunik ikilisaassappat akileraarutitigut isertitassataluit nunatta karsiata amigaatigilissavai, Bjartur Nolsøe Jyllandspostenimut taama naliliivoq.
Aamma oqarpoq, Namminersorlutik Oqartussat sipaarniassappata pisortat suliffeqarfiutaannut annertuumik aningaasaliissuteqartoqarsinnaanissaa naatsorsuutigineqarsinnaanngitsoq.
-Kalaallit Nunaata nunanit allanit aningaasaliiffigineqarnissani pisariaqartippaa, periarfissat atorluarneqassappata. Tamannalu anguneqassappat Naalakkersuisut aningaasatigut isumatusaartumik sivisujaamik sulisariaqarallarput, tungaanullu Kalaallit Nunaat aningaasaliisoqarnissaanut utaqqimaartariaqarallarpoq, Bjartur Nolsøe oqarpoq.
