Avataq: Aatsitassarsiornissat pillugit tusarniaanerit tusiapipput
Tusarniaanernut atatillugu piffissaq atorneqartoq sivikippallaarpoq, sukkavallaamik ingerlanneqarlutik. Avatangiisinik illersuiniaqatigiiffik Avataq taama isumaqarpoq, innuttaasullu peqataanerutinneqarnissaat ujartorlugu:
Innuttaasut aalajangigassanut peqataatinneqarnerusalersinnaanissaat. Tassa Naalakkersuisut nutaat ivertinneqarnerminnut atatillugu ilaatigut oqariartuutaat. Aatsitassaqarnermut Naalakkersuisup Avatamut allagaqaateqarnermini ilaatigut oqaatigaa innuttaasut aatsitassanut politikkeqarnermi innuttaasunut ataatsimiititsisarnerni peqataatinneqarnerusalissasut. Avattalli siulittaasuata Mikkel Myrupip Aatsitassaqarnermut Naalakkersuisup Jens-Erik Kirkegaardip allagaqaataa apeqquserpaa:
- Qeqertarsuatsiaani rubinisiorfissamut tunngatinneqarpoq. Tassa rubinisiorfissamut tunngatillugu tusarniaanermi innuttaasut peqataatinneqarnerat tusarniaanernut allanut, assersuutigalugu suliniutinut angisuunut tunngatillugu tusarniaanernut aallaaviusinnaasutut takorloorneqarmata. Avataminngaanniilli isumaqarpugut tamanna pissusissamisuunngitsoq, tassami assersuutigalugu Isukasiani pilersaarutit pillugit inuiaqatigiinni suli oqallittoqangaatsiartoqartariaqarpoq, uranimullu naaggaarluinnarnerup taamaatinneqarsinnaanissaa pillugu aamma taamaattoqaqqaartariaqarluni, Avattap siulittaasua Mikkel Myrup oqarpoq.
True North Gemsip rubinisiorfissani pillugu innuttaasunut illoqarfinni nunaqarfinnilu pingasuni innuttaasunit ornigarneqarluartunik sapaatip-akunnerup ataatsip matuma siornatigut paasititsiniaavoq, innuttaasunillu tusarniaalluni ataatsimiisitsinerit pisortatigoortumik ippassaq aallarnerneqarlutik. Paamiut katersortarfianni unnugu nalunaaqutaq arfineq-marlunut ataatsimiittoqassaaq, Nuummilu Katuami sisamanngorpat unnukkut ataatsimiititsisoqarumaarluni.
Taamatulli tusarniaasoqartarnera pipallataavallaartutut avatangiisinik illersuiniaqatigiiffiit soorlu Avataq nalilerpaat, innuttaasut aalajangigassanut peqataatinneqarnerusalernissaannut Naalakkersuisut oqariartutaannut naapertuunnatik:
- Siumup Inatsisartunut qinersinermi amerlanerussuteqaqqalaarnini aallaavigalugu oqaatigaa innuttaasut tassa isummereersut, tamannali akuerineqarsinnaanngilaq. Apeqqutimmi akissutissarsineqartussat inuiaqatigiinnut kalaallinut pingaaruteqartorujussuupput, tamakkulu qarsupiinnarlugillusooq pisoqarsinnaanani, Mikkel Myrup oqarpoq.
Suliniutinut angisuunut inatsimmut allannguutissatut Naalakkersuisut siunnersuutaat Inatsisartut ukiaanerani taasissutigisussaavaat, soorlu aamma uranimut naaggaarluinnarnerup atorunnaarsinneqarsinnaanissaa isummerfigineqassasoq, uranimullu tunngatillugu innuttaasut tusarniaaffigineqarsimanngillat, London Miningillu nammineq piumasai, Aatsitassaqarnermullu Aqutsisoqarfiup piumasai aallaavigalugit tusarniaasoqarsimasoq, Avataq isumaqarpoq, Qeqertarsuatsiaallu eqqaanni rubinisiornissamut tunngatillugu tusarniaanernik tamanna innarliilluni:
- Qeqertarsuatsiaat assersuutitut atorneqarsinnaanissaat pissusissamisuunngilaq. Pilersaarutit annerit naammasseqqaarlugit ingerlariaqqissinnaavugut, Avattap siulittaasua Mikkel Myrup oqarpoq.
Aatsitassarsiornissat pillugit innuttaasut peqataatinneqarpallaannginnerat oqariartuutigalugu, Kommuneqarfik Sermersuup borgmesteria Asii Chemnitz Narup tusagassiuutinut ullumi aamma allagaqaateqarpoq.
