Politiit ullormut nalunaarutaat: Atuarfimmi ikuallattoqartoq 15-inillu ukiulimmut nakuusernermut politiit ilisimannittunik ujaasisut

Qilaliarfimmi politiit ulapaarsimasut, pisullu amerlanerit imigassartornermut attuumassuteqarsimasut, Kalaallit Nunaanni Politiit sillimasut pisortaata, Poul Kreutzmannip oqaatigaa.  

Tamatuma saniatigut, atuarfimmi ASK-imi ippassaq ualikkut nalunaaqutaq tallimat missaanni  ikuallattoqarsimasoq, sillimasut pisortaat nassuiaavoq.  Politiit qatserisartullu pisoqarfiusumiipput, paasiniareernerullu kingorna paasineqarpoq, ikuallanneq eqaarsaartarfimmit aallartissimasoq. 

- Piaaraluni ikuallatsitsisoqarsimasoq ilimagaarput, Poul Kreutzmann oqarpoq.

Ikuallannerup nalaani nukappissat 15-it ataallugit ukiullit assiliissummi takuneqarsinnaasimapput, suliamulli atatillugu politiit suli tigusarinnissimanatik. 

Politiit takunnissimasunik ujaasisut

Angut inuusuttuaraq 15-inik ukiulik Nuummi Eqalugalinnguit tasiata eqqaani saassunneqarpoq.  15-inik ukiulik tallimanngornerup unnuaani nalunaaqutaq ataaseq qaangerlugu tanneq marlunngulersoq  saassunneqarpoq, suliamullu atatillugu politiit takunnissimasinnaasunik ujaasipput. 

- Nukappissat ukioqatigiiaat pingasut sisamallu akornanniittut saassussisimapput, saassussisullu taartuinnarnik atisaqarsimapput, Poul Kreutzmann oqarpoq. 

Sillimasut pisortaata oqarnera naapertorlugu, nukappissat Nuussuup tungaanut qimaasimassangatinneqarput. 

Tamatuma saniatigut Aasiaat kujataatungaanni Attumi angut aalakoortoq aallaaserluni inunnut arlarlinnut qunusaarisimasoq politiinut unnerluutigineqarsimavoq. 

- Aasiaannit angallammik Attuliartitsisoqarpoq, suliamut atatillugu inuit arlariit apersorneqarsimagaluarput, apersorneqartulli tamarmik aalakuungaatsiarsimammata annerusumik paasisaqarfiusimanngitsoq, Poul Kreutzmann nassuiaavoq.    

Suliarlu maannamut unitsinneqarluni.