Nunaqarfik oqummik eqqugaasoq: Atuarfik kisimi oqoqanngilaq
Uummannap eqqaani nunaqarfik Ikerasak oqummik annertuumik eqqugaaqqavoq.
Ikerasammi Ole Løvstrømip Atuarfiata oqummik eqqugaanera pissutigalugu matusariaqalernera KNR-imit siusinnerusukkut oqaluttuaraarput. Atuarfilli kisimi eqqugaanngitsoq nalunaarusiami erserpoq.
Ikerasammimi nakorsiartarfik, Illu sullivik, ilinniartitsisup illua aamma meeqqerivik oqummik aamma eqqugaasimasut nalunaarusiami erserpoq.
Politikeri tupaqqasoq
Nunaqarfimmi illut arlallit oqummik eqqugaasimanerat, Avannaata Kommuniani Siumut gruppiani siulittaasup tulliata Jens Kristian Therkelsenip tupaallaatigaa.
- Tassa soorunami tupannarpoq pingaartumik Ikerasammiuulluni aammalu qinikkatut inissisimalluni nunaqarfigisamiilluni, Jens Kristian Therkelsen (S) oqarpoq.
Ataatsimut isigalugu piaartumik iliuuseqartoqanngippat nunaqarfimmi innuttaasut annertuumik Jens Kristian Therkelsenip eqqugaaratarsinnaasorai.
- Soorunami ataatsimut isigalugu nunaqarfik annertuumik eqqugaaratarsinnaavoq massakkut atuarfiup matunerata kingorna aammalu illu sulliviup misissornerata kingorna takusinnaavarput arlaatigut eqquisinnaanera nunaqarfimmut annertoorujussuusoq, taanna oqarpoq.
Atuartut kisimik eqqugaanngitsut
Atuarfik oktoberip 14-iani atuartitsiffiujunnaarsinneqarpoq, taamaalillutik atuartut 30-t katersortarfimmi atuartinneqartalerput.
Atuareernerulli kingorna atuarfik peqatigiiffinnit Arctic Sportertartunillu aamma atorneqartaraluarpoq. Arctic Sportertartullu katersortarfimmi inissakillioraluarlutik maanna sungiusartartut, Arctic Sport Ikerasammi sungiusaasup Qasiaq Langep KNR-imut oqaatigaa.
Ikerasammi illu sullivik meeqqerivillu illumi ataatsimoorput. Illu sullivillu annertuumik aamma oqoqartoq nalunaarusiami allaqqavoq. Tamannalu piaartumik sulliarineqanngippat Ikerasak meeqqeriveqarnikkut aamma eqqugaasinnaanera, Jens Kristian Therkelsenip ilanngullugu oqaatigaa.
- Tassa ataatsimut isigalugu Ikerasammi meeqqat annertoorujussuarmik eqqugaapput atuartut taavalu aamma meeqqerivimmiittut, taanna oqarpoq
Sikusarnera ajornartorsiortitsisinnaasoq
Ikerasammi ukiukkut sikusarpoq, tamannalu pissutigalugu innuttaasut sivisuumik eqqugaaqqasinnaanerat Jens Kristian Therkelsenip ernummatigaa.
- Ernummatigingatsigu uagut sikusartumiikkatta, taavalu umiarsuit nalunngisatsitut malillugit pajuttut novembarip naanerata missaani kingulliit tikittarput aatsaallu junimi tullia tikeqqittarluni, taava taanna angumerineqassanngippat aaqqissuinissamut taava annilaanngatigaarput sivisunerusumik taamatut inissisimaneq ingerlaannassasoq, taanna oqarpoq.
Ikerasammilu atuartut ukiumi atuarfiusumi sapinngisamik annaasaqannginnissaat pingaartillugu, Jens Kristian Therkelsen Avannaata Kommuniani kommunalbestyrelsemut suliakkiuteqarpoq.
-Taanna siunertarivarput taamatut sakkortuumik suliakkiuteqarnitsinni aammalu pimoorulluinnarparput taanna, neriuppungalu aamma kommunalbestyrelsep aamma pimoorulluinnassangaa, Jens Kristian Therkelsen oqarpoq.
Suliamut tunngatillugu Avannaata Kommunia KNR-imiit paasiniaaffigaarput, taakkulu suliap sumut killinneranik misissuereerunik uterfigeqqissalluta oqaatigaat.
