Atassutip Demokraatillu naalakkersuisoqatigiiliornermi suleqatigiinnissaat ilimanarsilluinnartoq
Atassut naalakkersuisoqatigiiliornissaq anguniarlugu isumaqatigiinniarnernut suli peqataavoq.
Kissaatit piumasaqatillu Atassutip Demokraatillu akunnerminni naaperiutigereerpaat.
Taakkualu pitsaasumik maannamut Atassummut inerneqartut, siulittaasuat KNR-imut ullaaq manna qulinngulersoq oqarpoq.
Atassut naalakkersuisoqatigiiliornissamut peqataassalluni neriuppoq.
- Neriuuteqarfigivarput tamanna angusinnaallugu. Kisiannili tassa piumasaqaatigivarput siammasissumik suleqatigiiliortariaqartoq maannakkut partii siuttuusoq. Naak partii ataaseq anereeraluartoq neriuppugut partiit sinneri taava suleqataasinnaassasut, taamaalilluta aamma akisussaaffimmik tiguseqataajumaaratta, Aqqalu Jerimiassen KNR-mut oqarpoq.
Inaarutaasumik oqaloqatigiinneq kisinngoruttoq, taanna aamma oqarpoq.
Atassut: USA ataatsimoornissamik pisussaaffiliivoq
Atassut Demokraatillu naalakkersuisoqatigiilernissaat qanillilluinnarpoq. Partiilli taakkua marluinnaallutik amerlanerussuteqarsinnaanngillat. Taamaattumik Inuit Ataqatigiinnit Siumumiilluunniit, imaluunniit taakkunannga tamanit, amerlanerussuserneqartariaqarput.
Demokraatit siammasissumik suleqatigiiliornissaq anguniarlugu sulinertik siusinnerusukkut aamma nalunaarutigereerpaat. Ippassarli ataasinngornermi qinersinermi partii anginerpaamut tullinngortoq, Naleraq, isumaqatigiinniaqataajunnaartoq illua-tungeriit nalunaarutigaat. Tassani namminersorneq pillugu inatsimmi paragraf 21 aporfiusoq nalunaarutaavoq.
Atassulli allatut iliorusuppoq. Tassa USA-p nunatsinnik pileriginnillunilu nunamit tassannga nunatsinnut tikeraartoqarniarnera ilaatigut peqqutigalugu suleqatigiinnik amerlanerussuteqarluartunik kissaateqarpoq.
- USA-p pissusilersuutai assigiinngitsut eqqarsaatigissagaanni pingaartuutipparput partiit amerlanerpaalluta tasiorluta nunarput illersussallugu, suleqatigiinnermik nipeqarluta pinissarput taanna salliukkusukkatsigu, Aqqalu Jerimiassen oqarpoq.
D, IA aamma A suleqatigiissinnaasut
Siumulli isumaqatigiinniaqataajunnaassagaluarpat, Inuit Ataqatigiit Demokraatit Atassutillu suleqatigiissinnaanerat Kalaallit Nunaanni partiit Inatsisartunut ilaasortakinnersaata ajoriffissaqartinngilaa.
- Oqaloqatigiiffissatta takutikkumaarpaat. Kisiannili akisussaaffimmik tiguseqataanissamut piareersimaneq taanna isertuutinngilarput Atassummit, Aqqalu Jerimiassen oqarpoq.
KNR-ip Siumup siulittaasorigallagaa Vivian Motzfeldt ullaaq manna aamma attaveqarfigaa. Siumut isumaqatigiinniarnernut suli ilaasoq siulittaasuugallartoq aamma ilisimatitsivoq.
