Assammik arsartartut GSS Las Vegasimut tikipput

Kiisami iluatsippoq.

Assammik arsarnermi peqatigiiffik GSS Nuummeersoq aningaasanik katersaminik naammatsitsivoq Amerikap avannaata Caribiallu Champions Leagueanni peqataanissamut unammineri ullumi tallimanngornermi Las Vegasimi aallartissapput. Nunani Mexicomi, Puerto Ricomi, USA-mi Canadamilu pissartaasut unamminerminni peqatigiiffikkaartumik nunarsuarmi pissartanngorniunnissamut anngunniutissapput.

Maannalu tassa siullermeerutaasumik iligiinnik kalaallinik peqataasoqarpoq.

- Sapinngisarput tamaat unamminerni ajugaaniassarissaagut peqataasullu paasisaqarfigillattaalerpagut. Amerikamiut iligiit California Eagles arsartunik assigiinngitsuneersunik katersaapput. Taamaattumik akissarsiutigalugu unammisartuupajaartunut unammissaagut, GSS-mi assammik arsartartuni siulittaasuullunilu arsartoq Nuka Heilmann KNR-mut oqarpoq.

California Eagles siorna ajugaasuupput maanna kalaalersarivaat Minik Dahl Høegh. Aammattaaq aningaasarsiutigalugu sungisaasoq Spaniameersoq Dani Gordo attartorsimavaat taannalu nunani tamalaani sungiusaasutut misilittagaqarluarpoq.

Unamminerit ullumi aallartissapput aallarniutigalugulu GSS arsanngikkallassaaq.

Semifinalet

Nuummiut arfininngornermi unammeqqaalerunik Puerto Ricomi pissartaasunut unammissapput puljemilu sakkortuutut taaneqarsinnaasut California Eagles sapaatiuppat unammissallugit.

- Assut sungiusarnikuuvugut aammalu aallarsinnaajumalluta aningaasanik katersuiniarluta tamaviaarnikuulluta, Nuka Bilo Heilmann oqarpoq.

- Taamaattumik aningaasatigut tapiissuteqartunut assut qujamasuppugut, Nuka Bilo Heilmann oqarpoq.

GSS-meersut toqqaannartumik Nuummiik New Yorkimut timmisartorput tassanngaanniillu Chicago aqqusaarlugu Las Vegasimut ingerlaqqillutik.

- Toqqaannartumik angalalluni iluarneroqaaq. Siornatigut nunanut allanut unammisartuni USA-mut angalagaangatta Danmark aqqusaaqqaartarparput. Massakkut sakkortulaaraluarpoq kisianni sinilluariaratta piareeqqavugut, Nuka Bilo Heilmann oqarpoq.

Puljeni inissilluarnerit marluk semifinalenut ataasinngorpat pisussanut ingerlaqqissapput. Marlunngormat inissinniuttoqassaaq.

Unammersuarnermi ajugaasut peqatigiiffikkaartumik nunarsuarmi pissartanngorniunnissamut septemberip naaneraniit Egyptenimi pisussamut anngutissapput.