Assammik arsarluni GM-ertoqarnerani ulloq finalerfik

Assammik arsarluni Nunatsinni pissartanngorniunnerit Sisimiuni ukiormanna ingerlanneqarput. GSS-ip Nuummeersup arnatai angutitaalu finalinut anngupput.
Allattoq Peter Troelsen, Simon Uldum
apriilip 27-at 2013 09:52

Arnani NÛK GSS-ilu Nuummeersut finalernissaat qangali paasineqareerpoq, SAK-llu I-69-illu bronzennanniuttussanngornerat ippassaq paasinarsivoq. SAK-p Nagdlúnguamut qularnaatsumik ajugaanera kingorna tamanna inissippoq.

Angutit unammisaqattaarnerini GSS N-48-lu finalissapput. GSS-p arnartai assingalugit angutittaaq unammisaqattaarnerni ajorsartinneqarsimanngillat finalimilu ajugaasussatut aamma ilimagineqarluinnarlutik. Unamminerimmi aallartinnerini ullumikkut unammisassartik N-48 43 - 17-ersuarnik ajugaaffigisimavaat. NÛK SAK-lu angutit nunatsinni pissartanngorniunnerini bronzennanniullutik unammissapput.

KNR Radiop finalerlutik unammisut aallakaatissavai. Arnat finalernerat nal. 17.45 aallartissaaq angutillu finalernerat nal. 19.30 aallartissalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq