ASK-ip oqoqarsinnaaneranik misissuinerup inerneri sapaatip-akunnerata tulliani piariissapput
Atuartut maanna ukiaanerani atuanngiffeqarput, Kommuneqarfik Sermersuullu Nuummi illoqarfiup atuarfiisa ilaanni ASK-imi illup iluata silaannaanik misissuinerup inerneri utaqqivaa.
Avataaniit misissuititsinerup inernerisa nalunaarusiaat sapaatip-akunnerata tulliani piariissangatinneqaraluarpoq, aatsaalli sapaatip-akunnerata tulliani piariissaaq, taamak kommuni nittartakkamini paasissutissiivoq.
Ukiaanerani atuanngiffiulernera pissutigalugu, ilinniartitsisut atuartullu pigisaminnik poortuissasut sapaatip-akunnera kingulleq naalersoq qinnuigineqarput. Misissuinerup inerneri piareernissaata tungaanut atuartitsineq nalinginnaasumik ingerlaannassasoq, kommunip paasissutissiissutigaa.
- Avammut attaveqarnitsinni ammasumik eqqortumillu attaveqaqateqarusuppugut. Pingaarnerpaavorlu meeqqat ulluinnarni toqqissisimanissaat, paasisaqarnissatta tungaanut, Meeqqanut Atuarfeqarnermullu Ingerlatsivimmi pisortaq Lone Nukaaraq Møller oqarpoq.
Iliuuseqariataarnissamut pilersaarut piareeqqasoq
Atuarfiup oqoqarneranik misissuineq takutitissagaluarpat, Kommuni aamma pilersaarummik piareersimatitsivoq. Pilersaarut piffissap sivikitsup iluani atuutilersinneqarsinnaasoq, kommuni allappoq, aamma ‘angajoqqaat inuiaqatigiillu toqqaannartumik kingusinaarnertaqanngitsumik paasitinneqarnissaat piareersimatinneqarpoq’, kommunimit oqaatigineqarpoq.
- Mianersornissamik tunngaveqarluni sulineq ingerlapparput pisariaqalissappallu iliuseqariataarnissamut piareersimalluta. Meeqqat sulisullu peqqissusaat pingaarnerpaavoq taamaattumillu nalunaarusiap takutissagaluarpagu pilersaarusiaq erngertumik atuutilersinnaasoq piareersimasuutigaarput, Meeqqanut Atuarfeqarnermullu Ingerlatsivimmi pisortaq Lone Nukaaraq Møller oqarpoq.
Nuummi illoqarfimmi atuarfik nutaannginnerusup aappaa USK, oqoqarnera pissutigalugu septembarip 23-anili matoqqavoq, atuarfittaarli Atuarfik Inussuk suli atorneqalinngilaq.
