Arsaannermi nunanut allanut unammisartut Tyrkialialersut
Illup iluani arsaannermi ukioq unammiffiusoq naggaserlugu dommerit siggarnerat nipaaruteqqajanngitsoqq silami arsaannermi pisussaq siulleq nalunaarutigineqarpoq.
Silami arsaannermi nuna tamakkerlugu sungiusaasoq Morten Rutkjær nalunaaruteqarpoq nunanut allanut unammisartut maajip naanerani Tyrkialiassamaalersut. Unammisassaat tassaapput nunat arsaattartut nunarsuarmi kattuffissuanni FIFA-mi ilaasortaanngitsut. Taakku tassaapput Turkmenistan aamma Kirgisistan kiisalu peqatigiiffik Tyrkiameersoq pikkorissut akornanni unammeqataasartoq.
- Unammisassavut ilikkagaqarfiulluassapput Kalaallit Nunaanni arsariaatsimiit allaanerusumik arsariaaseqaramik. Tamanna aamma kissaatigivara taamatut ittut aappaagu qeqertarmiut unammiuaarneranni Island Gamesimi unammisussaagatsigit, nuna tamakkerlugu sungiusaasoq Morten Rutkjær KNR-mut oqarpoq.
Unammisat peqqarniitsut
Island Games tassaavoq inuiaqatigiit qeqertani inukitsuneersut unammersuartarnerat ukioq allortarlugu pisartoq aappaagulu Skotlandip kujatinnguani Orkneymi pisussaq.
Kalaallit Tyrkiami unammisassaat sukalassuseqarput Nunatsinni ivigaasaaqqani arsaattarnermit sakkortunerusumik.
- Unammisassavut annertuunik anguniagaqarput tamatumunnga piareersaateqaleruttortut. Sukkasuumik arsariaaseqarput peqqarniitsuullutillu, Morten Rutkjær oqarpoq.
- Sungiusimasatsinnit aamma allaanerusumik arsariaaseqarmata arsaattutta periutsitik allanngortinniartussaavaat tamatumunngalu misilittakkanik assut pissarsitikkusuppakka, Morten Rutkjær oqarpoq.
Silami arsaannermi nunanut allanut unammisartunut aningaasatigut sinaakkutit pissutaallutik maanna angalanissaq ukioq manna angalanituaassaaq.
