Arnat spiralilersugaasimasut palasinit ikiorneqassasut

Nunatsinni palasit Sisimiuni sapaatip akunnerata siuliani ataatsimiipput.

Taakku sammisat oqaluffimmut attuumassuteqartut arlallit oqaluuseraat. Oqaloqatigiittarnernilli nalinginnaasunit ataaseq immikkut ittuuvoq.

Palasit naartunaveersaasersuineq pillugu nalunaarusiat pillugit tarnikkut anniaateqartut pillugit qanoq suliaqassanerlutik oqaluuseraat.

Tamanna biskoppip Paneeraq Siegstad Munkip oqaluttuaraa.

- Aap, tarnikkut isumassuinermik palasit ulluinnarni naapittarpaat inuit qanorluunniit nalaataqarsimasut.

- Taakkununnga ilaapput naartunaveersaasersorneqarsimasut, taakku palasit saaffigisarpaat, tarnikkullu artorsaatiminnik avitseqatigalugit.

Oqariartuummik siammarterineq

Trine Berner Madsen Patienterststningimit ataatsimiinnermut peqataavoq. Taanna naartunaveersaasersuisimanermut atatillugu allattoqarfimmut pisortaavoq. 

Allattoqarfiup pisortaata palasit arnat eqqugaasut Danmarkimit taarsiivigineqarnissaannut qinnuteqaasiornissaannut qanoq ilitsersuisinnaanerat pillugu ilisimatinneqareersut, biskoppip oqaluttuaraa.

- Naartunaveersaasersorneqarsimasut taarsiiffigitinnissamik immersuissagunik imaluunniit qinnuteqassagunik suut eqqumaffissaanersut siunnersuisussaatitaanitta ataani ilisimasariaqakkanik ilisimatinneqariartortussaavugut, Paneeraq S. Munk oqarpoq.

Biskop Paneeraq Siegsted Munkip palasit tarnikkut anniaateqartunut qanoq ikiuilluarsinnaanissaat eqqartorniarlugu arnallu naartunaveersaasersuinermit eqqugaasut Danmarkimit taarsiivigineqarnissamut qinnuteqaasiornissaannut qanoq ikiusinnaanerat pillugu ataatsimiititaasimanerat oqaluttuaraa. Assi © : KNR

Allaffissornikkut suliassat oqaatigineqallattaasut taakku ilissinnut imissutigineqalersutut paasineqarsinnaava?

- Naamik, ikiuunniarpugut paasissutissanik siammarteriffittut. Imaluunniit soorlu najukkami, nassiussiniaraanni qanorlu nalornilluni, taava palasit ikiuussinnaassapput, Paneeraq Siegstad Munk oqarpoq.

- Soorlu internetimut attaveqanngippata saaffiginnissutinik ingerlatitseqqiffittut, imaluunniit siunnersuisinnaalissaagut suliallu ingerlanneqarnerani saniani peqataasinnaanissatsinnut.

Saamaasseqatigiinnermut attuumassuteqartoq

Danskit ilagiinnut ministeriat, Ida Auken, Nuummut Qeqertarsuatsiaanullu sapaatip-akunnera kingulleq tikeraarpoq.

Taassuma nuna tamakkerlugu nunaqarfinni oqaluffiit taarsiivigineqarnissamut periarfissaq pillugu siammartereqataasinnaanerat nuannaarutigeqaa. 

- Palasit Sisimiuni katersuunnerminni naartunaveersaasersuinermi suliamik oqallisiginninnissamut periarfissaqarnerat arnanullu nunaqarfinniittunut Danmarkimit taarsiissuteqartoqarnissaanut qinnuteqarnissaannut periarfissaq pillugu nalunaaruteqarnissamut ikiuussinnaanerat nuannaarutigilluinnarpara, Ida Auken oqarpoq.

Danskit ilageeqarnermut ministeriata, Ida Aukenip palasit kalaallillu oqaluffiisa aliasuuteqartunut ikiuussinnaanerat arnanullu eqqugaasimasunut taarsiissuteqarnissamut tunngatillugu paasissutissanik ingerlatitseqqiisinnaanerat saammaateqatigiinnissamut suliap ilaatut isigaa. Assi © : Henriette Simonsen / KNR

Oqariartuummik siammarterinermut ikiuussinnaanerat aamma arnanut anniiaatigilluinnakkaminnik eqqaasinneqarlutik kingunerluumminnik uteqqiisunut ikiuussinnaanerat nuannaarutigilluinnarpara.

Naalakkersuisut danskillu tungaanniit saammaateqatigiinnissamut suliap annertuup ilaatut isigineqassava?

- Oqaluttuarisaanermi nuanniipporpassuaqarnera qularnanngilaq. Nalunaarusianik saqqummersitsisoqarpoq, naalakkersuisullu siulittaasuata saammaateqatigiinnissamut isumalioqatigiissitaliortoqarnissaa piumasaraa, danskillu ministeriunerata tamanna isumatsialaanerarpaa.

- Taamaammat aap una ilaasutut isigaara.