Arnat 171-it spiralilersuinermi suliami taarsiiffigineqarnissamut qaammatip ataatsip ingerlanerani qinnuteqartut
Kalaallit arnat akuersissuteqaratik spiralilerneqarsimasut taarsiiffigineqarnissaminnut juulip aallaqqaataannit qinnuteqarsinnaalerput, arlallillu qinnuteqareerput.
Arnat 171-it taarsiiffigineqarnissaminnut qaammatip ataatsip ingerlanerani qinnuteqaateqareerput.
Patienterstatningen taama paasissutissiivoq.
Patienterstatningip allattoqarfiani pisortap, Trine Berner Madsenip qinnuteqaatinik allanik qinnuteqartoqarsinnaajunnaarnissaata tungaanut tassa 2028-mi septembarip aallaqqaataata tungaanut nassiussisoqarnissaa naatsorsuutigaa.
- Arnat qinnuteqaasiornerminni nassuiaateqarniarnerminni kingunerluutigisimasaminnik uteqqiisariaqarnertik sakkortuneraraat sumiiffimmi arlalinni nalaapparput, taamaammat qinnuteqaateqartussat ilaat piffissamik pisariaqartitsisinnaapput. Aamma ikiorneqarnissamik ilitsersorneqarnissaminnillu pisariaqartitsisoqarpoq, taanna oqarpoq.
Taarsiissuteqarfigineqarnissamut periarfissaq arnanut kalaallinut akuersitinneqaqqaaratik 1991 tikillugu spiralilersorneqarsimasunut atuuppoq.
Arnat eqqugaasimasut qinnuteqaatertik Patienterstatningimut nassiutissavaat.
Arnamut ataatsimut 300.000 koruuninik taarsiissuteqarnissaq aalajangersagaavoq.
Patienterstatningilli qinnuteqaatit suliassaqarfimmi inatsit aatsaat atuutilerpat suliarisinnaavai.
Peqqissutsimut ilageeqarnermullu ministerip, Ida Aukenip (S) arnanut kalaallinut taarsiissuteqarnissamut aaqqiissuteqarnissamut inatsisissatut siunnersuut juunip 25-anni saqqummiuppaa.
Inatsisissatut siunnersuut ukioq manna siusinnerusukkut saqqummiunneqartussaagaluarpoq, qinersinissalli nalunaarutigineqarnera naalakkersuisooqatigiilernissamullu isumaqatiginninniarnerit pissutigalugit kinguartoorutigineqarpoq.
- Inatsit 2026-mi septembarip aallaqqaataanni atuutilissasoq naatsorsuutigineqarpoq, Patienterstatningen juulip aallaqqaataanni allappoq.
Taarsiissuteqartoqarnissaanut qinnuteqaatinik 2028-mi septembarip aallaqqaataata tungaanut suliaqartoqassaaq, qinnuteqartitsinissamulli piffissaliussaq isornartorsiorneqarsimavoq.
Inuit Pisinnaatitaaffii pillugit Siunnersuisoqatigiivisa piffissaliussaq ajornartorsiutaasoq – apriilimi oqaatigaat.
Siunnersuisoqatigiit oqarnerat naapertorlugu arnanik naartunaveersaaserneqarsimanerminnik ilisimanninngitsunik nakorsat suli ullumikkut nalaassisarnerat pissutaavoq.
Spiralilersuinermi suliaq arnanut kalaallinut inuusuttunut niviarsiaqqanullu naartunaveersaasersuinerup 1960-ikkunni aallartittup nalaani spiralilerneqarsimasunut tunngassuteqarpoq.
Arnat arlallit spiralilerneqarnissartik akuersissuteqarfigisimanagu tusagassiuutitigut saqqummiunnikuuaat.
Ministeriuneq, Mette Frederiksen (S) aamma naalakkersuisut siulittaasuat Jens-Frederik Nielsen suliamut atatillugu siorna utoqqatsissuteqarput.
Tamanna Danmarkip Kalaallit Nunaanni peqqinnissaqarfimmut oqartussaassuseqarnerata nalaani aamma nunatta oqartussaaffimmik tigusereernerata nalaani pisimaneranik pissuteqarpoq.
Ritzau
