Argentinamiut arnataat kiisami naartuersissinnaanngortut

Argentina Latinamerikami nunani annerni siullersaalluni naartuersittarneq inerteqqutaajunnaarsippaa. Sapaatit akunneri 14-it tungaannut naartusut naartuersissinnaanissaat Buenos Airesimi senatimi amerlanerussuteqartut akuersissutigaat.

Ilagiit katuullit naartuersittarneq pillugu nunarsuup immikkoortuani pineqartumi sunniuteqarsinnaanerat taamaasilluni qajannarsisinneqarpoq.

Argentinami senatimi sivisungaatsiartumik oqallittoqareersorlu taasisoqarmat amerlanerussuteqartut 38-t akuersipput 29-llu akerliullutik.

Pinngitsaaliilluni arneriffigineqarlutik naartulersimasut maannamut tamaallaat naartuersissinnaatitaapput, naartusulluunniit, naartunerulli arnap inuuneranut navianartorsiortitsisinnaappat.

Argentinap præsidentiata, Alberto Fernándezip, saamerliunerullunilu qiterpasissuusup, inatsisissatut siunnersuut saqqummiuppaa. Taamaaliorpoq naak ilagiit katuullit isummakkulluunniit qanganisarpaluttut isornartorsiuingaatsiaraluartut.

- Nammineq katuuliuvunga, nunalli inatsisai innuttaasunut naapertuuttunngortinnissaannut pisinnaatitaaffeqarpunga, Fernández oqarpoq.

Argentinami kisermaassilluni aqutsineq 1983-imi uppisinneqarmalli inuit 3000-init ikinnerunngitsut inatsisinik unioqqutitsinikkut naartuersinnermi toqusimapput.

Naartuersinnerit inatsisinik unioqqutitsinerusut ukiumut 370.000-t 520.000-llu akornanniikkajuttut Argentinami naalakkersuisut kisitsisaataasa takutippaat.

Paavi Frans Argentinami inunngorsimasuuvoq.

Senatimi taasinerup inernera saqqummiunneqarmat inuit tuusintilikkaat Buenos Airesimi senatip silataani katersuussimasut nuannapput, erfalasut qungasequtillu qorsut erfalatinneqarlutik.

Qalipaat qorsuk arnat Latinamerikami pisinnaatitaaffii pillugit sukataarutiginninnermut tunngatinneqarpoq.