Arctic Circle Trail: Ungasissumut pisunniartillutit qanoq pisinnaasaqartiginerit ilisimareertariaqarpat

Qaqqani isumannaatsumik pisunnissamut arlalinnik ajornanngitsunik eqqaamasassaqarpoq. Pingaarnerpaarli tassaavoq, nammineq piginnaasat piviusumit annerusutut nalilernaveersaarnissaat. Pisuttuartartoq misilittagalik taama oqarpoq.

Allattoq Lærke Schmidt Fallesen

juulip 22-at 2024 07:53

Nutserisoq Erninnguaq Reimer

Pingaartumik sivisuumik pisunnissaq pineqartillugu imminut unneqqariffiginissat pingaaruteqarpoq.

Sisimiut Kangerlussuullu akornanni pisuffimmik Arctic Circle Trailimik aqutsisoq, Lisa Germany taama oqaaqqissaaruteqarpoq.

Taanna nammineq nunami pisunnermik misilittagaqarluarpoq, pisulinnginnerminili nammineq piginnaasani qaangernaveersaartarpai.
Aqqut aalajangersimasoq ingerlaffigisinnaanagu nalileruniuk aallarneq ajorpoq, imaluunniit angallassisoqaqqaarluni aallartarpoq. Sunami tamarmi navianarsinnaavoq.

ALLAASERISANI TULLERIIAARTUNI SAMMISAQ: ISUMANNAATSUMIK AASARSIORNEQ

Aasaanerani ilummukaasut asiartullu imaaginnalertarput.

Ilummukaaniartut asiarniartulluunniit ilagippatsit, taava isumannaalluaqqaarnissat pingaarpoq.

Tassalu isumannaatsumik aasarsiorneq allaaserisani tulleriiaartuni ulluni makkunani sammisassavarput.

Pisuttuartarfik nammineq ulluinnarni suliffigisartakkani naliliiffissatut assersuutitut atorpaa.

- Arctic Circle Trail nunarsuarmi tamarmi ilungersunarnerpaanngilaq, taamaattorli ulluni arfinilinni arfineq-marlunniluunniit nerisassatit nammassinnaasariaqarpatit, taanna oqarpoq nangillunilu:

- Ulluinnarlugu pisunnerniinnaq angalasimaguit, taava tassani pisussanngilatit. Ullut arlallit pisuffiit ingerlaarfigisimagukkit, nassatallu tamarmik ilinnut assartuunneqarsimappata, taava tassani pisussanngilatit. Nammineq suut tamaasa tigummiarlugit ullut arlallit pisussimaguit aatsaat Arctic Circle Trailikkut pisussinnaassajunnarsivutit.

Aamma allanik piginnaasaqartariaqartoq

Qaqqatigut inoqanngitsukkut illoqarfinnit nunaqarfinnillu ungasissumiittukkut ingerlaarniaraanni timikkut piginnaasaqarnerup saniatigut aamma nunap assinganik atuisinnaanissaq nunallu ilusaata assigiinngisitaarneranik takunnissinnaanissaq pingaaruteqarpoq.

Aamma ajutoornermi ikiorneqarnissamut attaveqarsinnaasariaqarputit, tassanilu allamik pingaaruteqartoqarpoq.

- Ajunaalernermi kalerrisaaruteqartuaannarnissat innersuussutigaarput, Lisa Germany oqarpoq.

- Tamanna pisuffinni isorartuuni immikkut pingaaruteqarpoq. Kalaallit Nunaanni pisuffiit isorartunerusut amerlanersaat assersuutigalugu Arctic Circle Trail, Nuuk-Kapisillit imaluunniit Narsaq-Qassiarsuk, pisuffigigaanni oqarasuaatit angallattakkat aqqummi attaveqarneq ajorput, pisoqassappallu ikiorneqarnissamut attaveqarsinnaanissaq pisariaqarpoq, Lisa Germany nassuiaavoq.

Kikkut tamarmik ajutoorsinnaasut

Amerlanerpaartaat ajoquserneq ajoraluartut kalerrisaarullu pisariaqartinneqalertuaannanngikkaluartoq, suli ajutoortoqartarpoq. Assersuutigalugu Arctic Circle Trailimi siorna sisamariarluni ajunaalernermik kalerrisaarutit atorneqarput, annaassiniartoqartariaqarsimallunilu.

- Aqqut qiteqqukkukku isikkakkullu pilluttoorlutit, niukkut napiguit allamilluunnit pisuteqartumik pisussinnaajunnaaruit taava qanoq iliussavit?

- Aqqummi Arctic Circle Trailip qeqqaniikkuit ullut sisamat tallimallu akornanni siumut utimulluunnit pisussaatit. Annanniutissaqartariaqarputit qaammataasakkullu nassiussissut kisimi atorneqarsinnaavoq, taanna oqarpoq.

AJUTUUSAGALUARUIT IMA IKIORTISSARSIUSSAATIT

Ajutuussagaluaraanni ikiorneqarusukkaannilu arlalinnik periarfissaqarpoq. Inuup nammineq pigisinnaasai nalinginnaanerpaat pingasut tassaapput Personal Locator Beaconimik taaneqartartoq (PLB), qaammataasiakkut sumiiffimmik nassitsissut imaluunniit oqarasuaat qaammataasiamut attavilik.

PLB

Ajutoornermi kalerrisaarut mikisoq pisariunngitsoq SOS-erluni nalunaarutigineqarsinnaasoq. 3000 koruunit missani akeqarpoq. Batteriia ukiut arfinillit arfineq-marlullu atasinnaavoq atuisutullu nalunaarsortariaqarani.

Sumiinnermik qaammataasiakkut nalunaarsuut

Ajutoornermi kalerrisaarutaannaanngilaq. Taamattut ilaat GPS-imi nunap assitaqartarput sumiiffillu angerlarsimaffimmut nalunaarutigineqarsinnaavoq. Pisariinnerpaaq SPOT tracker-imik taaaneqartarpoq, Garmin-imeersorli inReach-imik taaneqartartoq nalunnginneqarnerpaavoq, taamaattullu piginnaasaqarnerusut angerlarsimaffimmiit allaffigineqarsinnaapput. inReach akikinnerpaaq 3000 koruunit missaani akeqarpoq saniatigullu atuisutut nalunaarutiginerani akiliisoqassaaq. Batteriilersorneqarsinnaavoq. Qanoq ikumatitsiginera apeqqutaalluni batteriip attartussusaa allanngorartarpoq, akunnerillu 75-iniit ullut 30-t tikillugit batteriia atasinnaavoq.

Oqarasuaat qaammataasiamut attavilik

Ikiortissarsiorluni kalerrisaarissutigisinnaanerata saniatigut oqaloqateqarluni mobilimullu attaveqarfiunngitsuniikkaluaraanni atorluarneqarsinnaavoq. Soorlu sianerluni atorneqarsinnaavoq. Oqarasuaatit qaammataasiamut attavillit ilaat Iridium aamma tassaavoq nunatsinni attavigissaarnerpaasartoq. Iridium nutaaq 10.000-20.000 koruunillu akornanni akeqartarpoq, pisuffigineqartartulli nalunnginneqartut ungasinngisaanni takornarialerisut attartortitsisinnaasarput. Atuisutut nalunaarnissaq pisariaqarpoq imaluunniit akiliilluni immertagaanissaa pisariaqarpoq.

Tigusiffik: Komud.dk, Garmin

Allisiguk

Lisa Germanyp innersuussutai peqqinnissamut imaluunniit angalanissamut sillimmasiinerit assigiisaattut taaneqarsinnaapput. ”Pisunnermi sillimmasiinermik" taaneqarsinnaasoq taanna oqarpoq.

- Ikinngutit pisoqatigigaluarukku pisuffillu qiteqqukkussiuk ikiortitssarsiortariaqalissagussi suli ullut sisamat pingasulluunniit pisuttariaqassaasi, taanna oqarpoq.

Naatsorsuutiginngisanik pisoqarsinnaavoq

Inuit ataasiakkaat pisunnermi ajutoortuunerusarput. Kisianni aamma allanik ajunaalernermi kalerrisaarummik atuiffiusinnaasumik pisoqarsinnaavoq.

Arctic Circle Trailimi qanittukkut taamatut pisoqarpoq. Pisuttuartartut eqimattat ilaasa Kangerlussuup qinnguata ungasinngisaani nunap ilaani nanuusorisaminnik takusaqarput. Ajunaalernermi kalerrisaarut ajornanngitsuaqqamik atorlugu annaassiniartarfimmut nalunaaruteqarnertik iluatsippaat, taamaalillutillu annaassiniartartunit tikinneqarlutik.

- Kalerrisaarutip ikinnerani "Nanoq” allassimavaat nassiullugulu, annaassiniartartullu qulimiguulik atorlugu pisuttut aasinnaasimavaat. Pisuttuartartut allat mianersoqqusinnaajumallugit, annaassiniartartut nanoq sumiissusersiniarsimagaluarpaat, Lisa Germany oqarpoq.

Nannumik ilumut takunnittoqarsimanersoq qulakkeerneqarsimanngilaq, kisianni pisoqartillugu ikioqquneqarsinnaanissamut periarfissaqarneq isumannaallisaanermik qulakkeerinninnerusoq taanna isumaqarpoq.

Qaammataasakkut nassitsissuteqaqqusinermik ingasattaajarinninnertut isumaqartut Arctic Circle Trailimiit ukiuni kingullerni naapinneqartuaannarput.

Arctic Circle Trailimiimmi ajunaalernermi kalerrisaarutinik nammineerlutik peqanngitsunut atukkiisalersimapput. Siorna 2023-mi 60-eriarlutik atukkiisimapput, ukioq mannalu taama amerlatigiinnassasut naatsorsuutigineqarpoq.

Nutaarsiassami kukkunermik nassaarsimaguit uunga allaffigineqarsinnaavugut.