Anna Wangenheimip isornartorsiuineq akissuteqarfigigaa: Naalakkersuisoqatigiinni anguniagassat suli taakkuupput

Anna Wangenheim (D) Peqqissutsimut Inunnullu Innarluutilinnut Naalakkersuisuunermi saniatigut Folketingimut qinigassanngortippoq.

KNR-ip taanna tamanna pillugu oqaloqatigaa, taassumalu Folketingimut asuliinnaq tunngavissaqarani qinigassanngortinnani oqaatigaa.

Taassuma qinigassanngortinnera Atassutip siulittaasuanit, Aqqalu C. Jerimiassenimit ilaatigut isornartorsiorneqarpoq, taassuma naalakkersuisoq ilungersuutigisariaqartumik akisussaaffeqarsoraa.

- Naalakkersuisooqataalernitsinni pingaarnerpaat ilaattut peqqinnissaqarfitta qanorluunniit aningaasameertigigaluallarutta salliuttuarneqarnissaa oqariartuutiginikooqaarput, taanna allappoq.

Aqqalu C. Jerimiassenip oqarnera naapertorlugu Anna Wangenheim maanna taamaaliunngilaq.

- Naalakkersuisup folketingimut maanna sassartup iliuusaanut tapersiinngilagut.

Anna Wangenheimip Danmarkimut aallartinneqassagaluaruni innuttaasut peqqinnissaqarnermi pitsaanerusumik atugassaqartinneqalernissaat qulakkeersinnaallugu apersorneqarnermini oqaatigaa.

- Innuttaasut Folketingimut sassarninnut atatillugu tatigalunnga taassagaluaruninnga aamma oqariartuutigereerparput: naalakkersuisutut tunuarumaarama. Folketingimi ilaasortaanera taanna taava ukkatarisinnaassallugu, taanna oqarpoq.

Suleqatigiinneq siammasissoq

Taassuma aalajangernini 'suleqatigiilluarnermik' angusaqarfiullunilu nunatta 'sutigut tamatigut nukittuumik isumannaatsumillu' inissisimanissaanut qulakkeerisartoq tunngavilersorpaa.

Anna Wangenheimip apersorneqarnermini innuttaasut atugarissaarnissaannik, pingaartumik peqqinnissaqarnermi qulakkeerinissamut ’siammasissumik suleqatigiittoqarnissaa’ pisariaqartoq arlaleriarluni erseqqissaatigaa.

Tamannalu Folketingimi anguneqarsinnaavoq.

- Taamaattumik ukkatarisussaassavara aamma Folketingimi peqqissutsimut suliassaqarfimmut kalluaasartut, aporfiusartut ilaatigut iliuuseqarfigissallugit aamma Danmarkiminngaanniit, taakkuugamik aamma suleqatigiiffissat nukittunerusut ujartorneqartariaqartut, Peqqissutsimut Inunnullu Innarluutilinnut Naalakkersusioq oqarpoq.

'Naalakkersuisoqatigiit anguniagaat suli taamaattut,' Peqqissutsimut Inunnullu Innarluutilinnut naalakkersuisoq, Anna Wangenheim, oqarpoq. Assi © : KNR

Anna Wangenheimip naalakkersuisunit tunuarnini anguniakkaminik allannguinavianngissoraa. Muminganillu naalakkersusioqatigiit suliaqarnerat, pingaartumik nunatta aningaasaqarnikkut siusinnerusumit pitsaanerusumik inissisimanera peqqinnissaqarfimmut ineriartortitsisinnaaffiusoq toqqissisimaffigilluinnarlugu oqaatigaa.

Sulineq asuleerneqassanngitsoq

KNR-ip Anna Wangenheimimik apersuinermini kalaallit innuttaasut peqqinnissaqarnermi pisariaqartitaminnik ikiorneqaannarnissaat qanoq isumaginiarneraa aperaa.

Amerlasuut tusaaneqanngitsutut misigisimasartut ilaatigut oqaatiginikuuaat.

Naalakkersuisutut innuttaasunit oqariartuutit taakku tigunikuuaatit. Naalakkersuisuujunnaassagaluaruit suliap ingerlaqqinnissaa qanoq qulakkeerniarpiuk?

- Aap, tassa atorfilittakka peqataasarput, taamaattumik ukua periuserisimasakka oqaatigisinnaanngilara soorunami naalakkersuisunngortussap suleriusaa qanoq ittuussanersoq kisianni ukua oqariartuutigineqartarsimasut tamarmik allattorsimapput, taanna oqarpoq, nangillunilu:

- Taamaattumik tunngavissaqarput ukua oqariartuutigineqartartut suleriaqqinnermi atorneqarnissaannut. Aamma naalakkersuisutut atuuffeqarninni innuttaasunik naapitsinermi massakkut peqqissutsimut isumaqatigiissutissami immikkut taakku oqariartuutit ikkunneqarput isumaqatiginninniarnitsinni partiinut.

- Taamaalilluta qulakkeerumallugu aamma innuttaasut oqariartuutigisimasaat pimoorunneqarlutik peqqissutsimik suliassaqarfinnut pitsanngorsaatissatut narlorissarneqarnissaat qulakkeerniarlugu.

Atugassarititaasut pitsaanerulernissaanut Danmarkimit qulakkeeriniartoq

Anna Wangenheimip kalaallit innuttaasut 1.200-t missaanniittut nunatsinni isumagineqarsinnaanngitsunik Danmarkimut ukiut tamaasa misissortikkiartortartut imaluunniit katsorsartikkiartortartut aamma nunaqqatikka 17.000-it missaanniittut Danmarkimi najugaqartut pisariaqartitaasa isumaginissaata pingaassusaa erseqqissaatigaa.

- Atugassarititaasut taakkununnga naalagaaffiup aamma isumaginniffigisussaagai isumaqaratta massakkut naligiinngittoqartorujussuuvoq, aamma naak massakkut naligiinnerunissamut aqqut titarsimasarput pinngoraluartoq, suli angusassaqartorujussuuvugut, taanna Danmarkimut peqqissariartortinneqartartut pillugit oqarpoq.

Kalaallinut Danmarkimi najugaqartunut tamanna aamma atuuppoq.

- Taakkua danskit peqqinnissaqarfianni ikiorneqarneranni aamma qulakkeerinniffigisassaqartorujussuuvugut. Naligiimmik assigiinnillu periarfissaannik ammaassiffiusariaqartunik, taannalu danskit qinigaat suleqatigalugit Folketingimi aamma suliassaavoq, Anna Wangenheim oqarpoq.

Naalakkersuisutut politikkikkut taakku sunniuteqarfigineqarsinnaanngitsut taassuma oqaatigaa, naalakkersuisuullunimi folketingimimi ilaasortatulli danskit ministeriinut akisussaatitsisoqarsinnaanngilaq.