Angutit marluk nunatsinnut hashimik 93 kiilumik anngiortumik eqqusseriarsimasutut eqqartuunneqartut

Hjørringimi eqqartuussiviup angutit marluk aalisariummi Kalaallit Nunaannukartussami hashimik 93 kiilumik nassataqartut ilanngaaserisunit sisamanngornermi paasineqartut tallimanngornermi ingerlaannartumik pineqaatissinneqarput.

TV2 Nord taama allaaserisaqarpoq.

Angutit marluk inatsisit tunngaviusut naapertorlugit tallimanngornermi ullaap tungaani sassartinneqarput. Angutip 26-nik ukiullip hashi 22,2 kiilu Kalaallit Nunaanni tunniunniarlugu nassuerutigaa. Pasineqartup aappaata – angutip 45-nik ukiullip hashi 71 kiilu Kalaallit Nunaannut eqqunniarlugu nassuerutigaa, TV2 Nord allappoq.

Ilanngaaserisut aalisariummi Hirtshalsimi umiarsualivimmiittumi hashimik 22,2 kiilumik aallaqqaammut nassaarput. Taamaammat misissueqqissaarneq aallartinneqarpoq. Nordjyllandip politiivinit politikommissæri, Kasper Brix tusagassiuutinut nalunaarummi allappoq:

- Misissueqqissaartartugut umiarsuup sinnerani misissuipput, unnuaq tamaat ullaakkullu misissuipput, tassanilu umiarsuup ineerartaata ilaanni hashimik allamik 71 kiilumik nassaarlutik, nalunaarummi allassimavoq.

Angutit marluk aappaa ukiumi ataatsimi aappaalu ukiup aappaata affaani parnaarussivimmiittussanngortinneqartut, TV2 Nord allappoq.

Angutit marluk anngiortumik eqqusseriarnermut ataatsimoorsimanerlutik nassuerutiginngilaat. Taamaammat suliat marluk immikkoortut pineqarput.

RITZAU