Angutit arnaniit akissarsiakkaanerusut – assigiinngissut pillugu innuttaasut ima oqarput

Nunatsinni angutit arnaniit isertitaqarnerupput. Tassa 20 procentimik isertitaqarnerullutik.

Naatsorsueqqissaartarfik naapertorlugu, agguaqatigiissillugu angutit 327.000 koruuninik siorna isertitaqarput – akerlianik arnat 271.000 koruuninik isertitaqartut.

Suiaassutsit akornanni pissaanerup agguataarnerata naligiinnginneranut ersersitsisuunera pissutaalluni “ajornartorsiuterujussuuvoq”, Naligiissitaanermut Siunnersuisoqatigiit KNR-imit apersorneqarami taama oqarpoq.  

Inuilli namminneq qanoq misigaat, assigiinngitsoqarneranullu suna peqqutaasorivaat? KNR-i Nuummi innuttaasut apersorpaat.

“Isumaqatiginngilara pissutigalugu naligiissitaanermi eqqortuunngilaq taanna.”

Niels Peter Mikaelsenip akissarsiat nikinganerannut suna pissutaanersoq ilisimaqqissaanngilaa, taamaattoqarnerali taassuma uggoraa.

- Isumaqatiginngilara pissutigalugu naligiissitaanermi eqqortuunngilaq taanna. Akissarsiat assigiittariaqaraluarput – kikkut tamarmik assigiimmik pineqartariaqaraluarput.

Angutit arnaniit isertitaqarnerujuarsinnarnerat aamma Siw Dovalop uggoraa. 

- Kukkunerusoraara. Inuiaqatigiinni tamarmi naligiinngitsitsisarpoq. Aningaasaqarnikkut naligiittoqalersinnagu naligiittoqalersinnaanngilaq. Ineriartorneq tamanna alianartuusoraara.

Angutit arnaniit akissarsiaqarneruneranut suna peqqutaasoraajuk?

- Oqaluttuarisaanermi nassuiaatigineqarsinnaasumik pissutissaqarluartoq eqqarsarpunga – tassa taakku aningaasanik isaatitseqqaaramik, taamaammat ineriartorneq taama ingerlalersimavoq. Taavalu suliassaqarfiit angutinit suliffigineqarnerusartut arnanit maanna suliffigineqarnerusartunit akissarsiaqarfiunerusarnerannut tunngassuteqartoq eqqarsarpunga.

Politikikut aaqqiissuteqarneq immaqa assigiinngissutaasup allanngortinneqarnissaanut iluaqutaasinnaassagaluarpoq, Siw Dovalo isumaqarpoq.

- Uanga suiaassutsinut pisassaqartitsisarnermut akerliunngitsuuvunga. Angutit suliassaqarfinni oqimaannerusuniinnerusarput. Piffissap ilaani arnanik sulilersitsinissamut piumasaqaateqartoqaleraluaruni suiaassutsit akornanni nalinginnaasumik agguataaqqaneruleriartorlutik ineriartortoqassasoq ilimagaara, KNR-imut taanna oqaluttuarpoq.

Angutit aalisartuupput arnallu meeqqanik paarsisuupput

Angut arnallu akissarsiaasa nikinganerat ph.d., emeritap, sammisamik Ilisimatusarfimmit ilisimatusarsimasup, Marie Kathrine Poppelip oqarnera naapertorlugu tamanna arnat angutinit akissarsiakinneruffiusuni sulinerusarnerannik pissuteqartutut ilaatigut nassuiaatigineqarpoq.

Tamanna Najánguak Lundbladip tupaallaatiginngilaa, suliassaqarfiit assigiinngitsuuneri akissarsiat assigiinngitsuunerannut aamma ataqatigiittut taanna isumaqarpoq.

- Arnat angutillu suliffii aamma assigiinngitsuusaramik. Taava angutit taakkuusarput aamma kilisattartut, arnat meeqqanik paarsisut. Taamaattumik tupigivallaanngilara taamannak nikingassut taamaattoqartoq - soorlu kilisaatini sulisut aningaasarsiaqarnerusarput meeqqerisuninngaanniit.

Angutit suliaqarfiini nukersorfiunerusariaqartarnerat nassuiaatit ilaattut erseqqissaatigaa.

- Peqqutaagunarpoq uagut angutitulli nukittuujunnginnatta uanga isummanni. Taamaalilluni kilisaatersorneq assersuutigiinnarpara taanna assersuutitut, arnatut nukigut taamatut atorsinnaannginnatsigit - arnaanerput pillugu.

Naak naligiinnginnerup qanoq aaqqiivigineqarsinnaanissaa erseqqissumik akissutissaqartinngikkaluarlugu, ineriartorneq piffissap ingerlanerani allannguuteqarnissaa neriuutigaa.

- Takorlooruminaatsilaarpara qanoq aaqqiisoqarsinnaanersoq. Kisianni isumaqarpunga massakkut ilinniagaqartartut amerliartortut aamma arnat qaffasissumik ilinniagaqartut. Taamaalillutik aamma atorfiit qaffasissut aamma angusinnaanerussagaat siunissami. Neriuppunga, KNR-imut taanna oqarpoq.