Angut toqutseriarsimasutut eqqartuussaasoq

Aappariit inuunerat Narsami siorna juulimi sisamanngornerit ilaanni unnukkut allanngorluinnarpoq.

Taamanikkummi sisamanngornermi unnukkut aqqanermut qiteqqunnerata missaani pisoq angutip 36-nik ukiullip arnamik toqutseriarsimasutut Eqqartuussisoqarfik Kujallermi ippassaq marlunngornermi eqqartuussaaneranut pissutaavoq.

Tamannalu angutip taassuma ukiuni sisamani pineqaatissinneqarneranik kinguneqarpoq.

Angut taanna toqutsinissamik siunertaqarluni arnaq savimmik marloriarlugu kapisimagaa oqarasuaammik aamma aseruisimasoq, angummut taassumunnga unnerluussummi allaqqavoq.

Savilersuutigisaa napisimasoq

- Unnerluussut ilungersunarpoq, angummi taanna toqutseriarsimasutut unnerluussaagami. Taamaammat suliap inernera aamma naammagisimaarpara, Kalaallit Nunaanni politiit unnerluussisuat oqarpoq.

Eqqartuussaasoq pinerlineqartorlu taamanikkut taamaattoqarnerani aappariittut, eqqartuussinermi paasinarsivoq. Pinerlineqartoq savimmik kapineqareernermini ikiunasuarneqarluni annaanneqarsimasoq eqqartuussaasullu savilersuutigisaa aamma napisimammat naffakua pinerlineqartup qitianut kappussimasoq, unnerluussummi aamma allaqqavoq.

Eqqartuussaasoq pinerliffigisaminut katillugit 12.000 krouuningajalluinnarnik, tassa 10.000 koruuninik toqutseriarnermut 1.800 koruuninillu oqarasuaammik aseruinermut akiliisussanngortitaavoq.

Angut eqqartuussaasoq politiit ilisimaarineqartuusoq eqqartuussut akuerigamiuk pineqaatissinneqarnissami tungaanut tigummineqarallaassaaq.