Politiit ullormut nalunaarutaat: Angut politiininngaanneersuusaarluni nakuusertoq

Angut najukkami illoqarfiup pingaarnersaata ilaanni, Nuussuarmiittumi, ippassaq unnukkut nalunaaqutaq qulingiluat missaanni, Kalaallit Nunaanni Politiivineernerarpoq.

Najugaqartup matu ammaramiuk nakuuserfigitippoq, Kalaallit Nunaanni politiini sillimasut pisortaat Aputsiaq Hansen pingasunngornermi ullaakkut oqaluttuarpoq. 

Angut politiinit kingorna tigusarineqarpoq pasillerneqarlunilu, kingornali iperagaavoq.

Sillimasut pisortaata pinerlineqartoq qanoq innersoq eqqaanngilaa.

Hashimik arlaleriarluni nassaartoqartoq

Ilanngaaserisulli poortukkanik hashimik imalinnik arlalinnik allakkerivimmi nassaarsimanerat inuillu marluk timmisartoq Danmarkimeersoq mimmat mittarfimmi misissuiffigineqartussanngorlugit unitsitaasimanerat, maluginiaqquaat. Ilanngaaserisut inuit unitsitaasut aappaata nassataasa akornganni hashi 492 grammi nassaarivaat.

- Hashi anngajaaq unitsitaasut ilaanni nassaarineqarpoq arsaarinnissutigineqarlunilu. Taanna ullumi kingusinnerusukkut sassartinneqarumaarpoq, Aputsiaq Hansen oqarpoq.

Aammattaaq politiit poortukkat sisamat allakkerivimmi nassaarineqartut qanoq oqimaatsigisumik hashimik imaqarnersut paasiniarlugu misissorpaat.

Tillinniarnerit marluk - sunngiffimmi ornittagaq eqqugaaqqittoq

Pigaartut pisortaata Uummannami sunngiffimmi ornittakkami ataasinngornerup unnuaani tillinniartoqarsimasoq ippassaq oqaluttuaraa, maannalu tillinniartoqaqqissimasoq, taanna oqaluttuarpoq.

- Sunngiffimmi ornittakkamut, ippassaq marlunngornerup unnuaani, tillinniartoqaqqippoq. Ataasinngornerup unnuaani tillinniartut tillinniaqqissimanersut naluarput, Aputsiaq Hansen oqarpoq.

Taamaattumik innuttaasut tillinniarnerit taakkua marluusut pillugit ilisimasaqarunik, politiinut saaffiginnissaannik kajumissaarpai. 

Politiit aamma suliamut allamut tunngatillugu innuttaasunit ikioqqupput. Qaanaami Pilersuisup quersuaani ataasinngornerup unnuaani marsip qulingiluaata qulingatalu akornanni tillinniartoqarsimanera pineqarpoq.

- Immiaaqqat quersuarmit annerusumik tillinneqarput. Taamaattumik innuttaasut tuniniaaqqittoqassagaluarpat eqqumaffiginninnissaannik kajumissaarneqarput, Aputsiaq Hansen oqarpoq.

Kalaallit Nunaanni Politiinut iluaqutaasinnaasunik paasissutissaateqaraanni, sillimasut pisortaata 70 14 18-mut sianertoqarnissaa imaluunniit Qaanaami Uummannamiluunniit politeeqarfimmut orniguttoqarnissaa kajumissaariutigaa.

Sillimasut pisortaata eqqaasaa kingulleq Qaqortumi Brugseneeqqami sulisup aningaasanik tillissimaneranut tunngavoq.

Sillimasut pisortaat pisoq pillugu oqaaseqaqqippallaanngilaq, angulli inersimasoq pineqartoq politiillu suliami misissuilereersimanerat oqaluttuaraa.