Politiit ullormut nalunaarutaat: Angut pinngitsaaliilluni kujannissimasutut unnerluutigineqartoq, ukiukitsoq imigassartorsimalluni biilimik ingerlatsisoq tigusarineqartoq Aasiannilu ikuallattoqartoq
Aasianni Nukissiorfik marlunngornermi ualikkut ikuallalerpoq. Nukissiorfik qaammataanngitsorluunniit qaangiuppoq kingullermik ikuallammat.
Ikuallanneq nalunaaqutaq 15.33 nalunaarutigineqarpoq, qamilertorneqarpoq pujuliungaatsiarlunili.
Kalaallit Nunaata Politiivini sillimasut pisortaat Aqqalu Petersen pingasunngornermi ullaakkut paasissutissiivoq.
Ikuallanneq illoqarfiup akunneq ataatsip missaani innaallagiaqannginneranik kinguneqarpoq. Suliaq suli misissorneqarpoq,qatserisartut politiillu ikuallattoqarsimatillugu misissuinerit pingasunngornermi ingerlanneqassasut, sillimasut pisortaat oqaluttuarpoq.
Ataasinngornermi pinngitsaaliilluni kujannittoq
Aqqalu Petersenilli oqaatigaa, nunaqarfimmi Tasiusami Nanortaliup eqqaani pinngitsaaliilluni kujannittoqarneranik ataasinngornermi decembarip aallaqqaataani nalunaarutiginnittoqartoq.
- Pinerluttoq angutaavoq 50-it missaanni ukioqarpoq, eqqunngitsuliorfigineqartorlu 20-t missaanni ukioqarluni, sillimasut pisortaat oqarpoq.
Pinerluttoq killisiorneqarpoq, suliami unnerluutigineqarpoq inuttullu misissorneqarpoq, iperagaaqqereerporli. Sillimasut pisortaatali erseqqissaatigaa, suliaq suli misissuiffigineqartoq, kingusinnerusukkullu eqqartuussisoqarumaarunnarsisoq.
Imigassartorsimatilluni biilimik ingerlatsineq aallarussinerlu
Marlunnik pisoqartoq, tassa aallarussisoqarlunilu imigassartorsimatilluni biilimik ingerlatsisoqartoq, sillimasut pisortaata naggataatigut oqaatigaa. Nuummi ataaseq Qaqortumilu ataaseq.
Nuummi pisoq nalunaaqutaq 04.20 pingasunngornermi ullaakkut nalunaarutigineqarpoq. Politiillu biili malersulermassuk Nuup Nuussuartaani qullersuarmut aporpoq.
Aquttoq aalakoortoq ukiukitsuusorlu paasineqarpoq. Angut inuusuttoq ajoqusinngilaq tigusarineqarlunili, unnerluutigineqarpoq, aavatalu qanoq promilleqartigineranik paasissutissiisussamik aaversilluni.
Allanittaaq ukiukitsunik biilimiittoqarpoq, qassiunersulli sillimasut pisortaata oqaatigisinnaanngilaa.
- Ukiukitsulli pineqarput, isumaginnittoqarfillu nalunaarfigineqarpoq, Aqqalu Petersen oqarpoq.
Qaqortumi pisoq Nuummi pisoq minutsialunnik sioqqutilaarlugu nalunaarutigineqarpoq, misissuisoqarnerali pissutigalugu suliaq pillugu sillimasut pisortaat oqaaseqarsinnaanngilaq.
