Angut kalaaleq anaanaminik toqutsisimasutut piffissami killiligaanngitsumi paarineqartussanngortinneqartoq

Århusimi eqqartuussiviup angut kalaaleq 45-nik ukiulik anaanaminik angerlarsimaffimminni ukioq manna toqutsisimasutut ullumi eqqartuunneqarpoq.

Toqutsineq angutip anaanani savimmik qungasiatigut tunusuatigullu ukioq manna februaarip 15-iani kapimmagu pivoq. Angutip killisiorneqarnermi aqaguani toqutsinini nassuerutigaa.

Angut ullumi eqqartuussinermi tarnikkut napparsimasunut immikkoortortaqarfimmut inissinneqartussanngortinneqarluni eqqartuunneqartoq, Østjyllandip Politiivinit suliami unnerluussisussaatitaasoq, Jesper Rubow oqarpoq.

- Angut tarnikkut ajornartorsiuteqarmat inissinneqartussanngortinneqarluni eqqartuunneqarpoq, taanna oqarpoq.

Angutip ullumi eqqartuussinermi nassuerutiginneqqippoq, tassa anaanani savimmik qungasiatigut kapisimalluni tamannalu toqqutigisimagaa. Taamaammat unnerluutigineqartup illersuisuatalu eqqartuussut akueraat.

Ikiuerneqarnissaa neriutiginartoq

Unnerluussisussaatitaasorlu eqqartuussut eqqortuusoq aamma isumaqarpoq.

- Suliaq alianartuuvoq. Angut tarnimigut napparsimavoq, nakorsallu angut silanngajaartuusoq nakorsat oqaatigaat, piffissamilu pinerliffiusumi aamma napparsimasimavoq, taamaammat inissiinissamik eqqartuunneqarnera eqqortuuvoq, tassanilu ikiorneqarsinnaanissaa neriutiginarluni, Jesper Rubow oqarpoq.

Angutip eqqartuunneqarnera piffissami sivisunerpaamik taaneqarneq ajorpoq. Tassa imaappoq angut ullut arlaanni aniguisinneqassappat eqqartuussisoq aalajangeeqqeqqaassaaq, unnerluussisussaatitaasoq oqarpoq.