Angerlarsimaffeqanngitsunut suppa qanilaarnermik kissalaarnermillu tunisissasoq

Angerlarsimaffeqanngitsunut maanna piffissaq nillerluinnarpoq.

Taamaammat Palaseqarfik angerlarsimaffeqanngitsunut pingasunngornikkut kateritsitsisarnerannut suut nerisassaassanersut aamma piareersimapput.

- Suppamik sassaallertoqartarpoq. Sila nilleqimmat kissartoqassasoq, Nuummi Palaseqarfiup isumassuinermut ataqatigiissaarisua, Beathe Møldrup oqarpoq.

Hans Egedep Oqaluffiani sisamanit aaqqissuussisoqartarpoq. Angerlarsimaffeqanngitsunullu nerisassallernissamut taamaallaat tunngassuteqanngitsoq Beathe Møldrup oqarpoq:

- Isumassuinermik aamma tullermut asanninnermik tunniussisinnaaneq pingaaruteqarpoq. Eqqaamaneqarlutik misigissavaat.

Inuuniarnikkut ajornartorsiortunut najuunneq

Suppatornerup saniatigut biibilimik atuaasoqarlunilu tussiaqatigiittoqartarpoq.

- Angerlarsimaffeqanngitsunut katersuutsitsineq pingaaruteqarpoq. Nerisassanik soorunami kissartortussapput, kisianni najorneqarnermik inooqatigiinnermillu misiginissat aamma pingaaruteqarluinnarpoq, Beathe Møldrup oqarpoq.

Taassuma angerlarsimaffeqanngitsut 90-it missaanniittut takkunnissaat naatsorsuutigaa. Ilisimatusarfiup issittumi atugarissaarnermut ilisimatusarfiannit angerlarsimaffeqanngitsunik 2022-mi kisitsineq naapertorlugu nunatsinni angerlarsimaffeqanngitsut 491-iupput, taakkunannga 156-it Nuummiipput.

Oqaluffimmi eqimattanut assigiinngitsunut inooqataanermut aaqqissuussinerit piffissami kingullermi aaqqissuunneqarput. Tamanna A.P Møller Fondenip aningaasaliineratigut Sømandhjemmillu suleqatigineratigut periarfissaavoq.

Meeqqanut marlunnik qaammatip siuliani aaqqissuussivugut, inooqataanermilu ajornartorsiuteqartut allat aamma nereqatigalugit, Beathe Møldrup oqarpoq.

Pissutsit ilungersunartut

Danskit ikiuiniaqatigiiffiat Hjælp Din Næste angerlarsimaffeqanngitsunut atisanik oqortunik tunioraaniarluni pizzanillu sassaalliuteqariartorluni sapaatip akunnerata siuliani Nuummiippoq.

Nammineq kajumissutsiminillu suliaqartup, Julius Asgerip qanoq ajornartorsiuteqartoqartiginera tupaallaatigaa.

- Pissutsit ilungersunartorujussuupput, suliniaqatigiiffinnik amerlanerusunik pisariaqartitsinerpaanut ikiuiartorluni Nuummukartoqarnissaa pisariaqartinneqarpoq.

Ilisimatusarnermik suliniuterujussuarmik, angerlarsimaffeqanngitsuunermik pinaveersaartitseqataasussamik 2024-mi aallartitsisoqarpoq.

Ilisimatusarfimmilu ilisimatusartut suliniummut Ilaassaagummut ukioq manna ilanngullugu atorneqartussanik 4,8 millionit koruuninik aningaasaliiffigineqarpoq.