Amerlanerussuteqartut kommunip avinneqarnissaanut taasisut
Nunatta kujataani kommuni avinneqassanersoq pillugu taasiartortut 58,8 procentiisa Nanortallip nunaqarfittaasalu Kommune Kujallermiikkunnaarlutik nammineq kommuneqalernissaat taavaat.
Taasisut 2,7 procentii akerliupput.
Kommune Kujalleq nittartakkamini unnummut allappoq.
Taasisinnaasunit 680-it taasiartorput, tassa taasisinnaasut 62,2 procentii taasiartorput.
Taasisartortut apeqqummut unnga isummeqquneqarput:
'Kissaatigaajuk Nanortalik, nunaqarfiillu tassunga atasut Narsarmijit, Aappilattoq, Tasiusaq, Ammassivik kiisalu Alluitsup Paa Kommune Kujallermit anillutik namminneq kommuninngussasut?'
Innuttaasut aappimik, naamimilluunniit taasisinnaatinneqarput.
Taasinerli maannakkut allannguissutaassanngitsoq
Amerlanerussuteqartullu akuersipput. Tamannali maannakkorpiaq allannguuteqartitsissanngitsoq, kommune nittartakkamini allappoq, tamannalu kommunimi pisortaanerup aamma erseqqissaatigaa.
- Taasititsinerup inernerata innuttaasut amerlanerussuteqartut apeqqummut qanoq isumaqarnerat takutippaa. Erseqqissassalluguli pingaaruteqarpoq taasititsineq una isumasiuilluni taasititsinerummat. Taamaattumik taasititsinerup inernera Nanortaliup namminerisamik kommuninngorneranik isumaqanngilaq.
- Kommunimmi aaqqissuussaanerannik allannguinissaq Kommune Kujallermiit aalajangiiffigineqarsinnaanngilaq. Suliassaq nuna tamakkerlugu politikkikkut suliarineqarumaarpoq, taasititsinerullu inernera innuttaasut isummersornerattut ilaatinneqarumaarpoq, Kommune Kujallermi pisortaaneq Randi Vestergaard Evaldsen oqarpoq.
Isumasiuinermi taasititsinermi inernerit Nanortallip inoqarfittaasalu kommunimut atassuteqaannarnissaanut apeqqutip suliareqqinneqarnissaanut ilaatinneqassapput.
