Amerikamiut umiarsuaat napparsimmavik USA-mit aallartoq

Amerikamiut umiarsuaat napparsimmavik USNS "Mercy" Mexicop Kangerliumarnganit  marlunngormat aallarpoq.
Tamanna TV2-mi allaaserineqarpoq, umiarsuillu sumiissusersiutaanni nittartakkatigoortuni, soorlu Vesselfinderimi Marine Trafficimilu, tamanna aamma takuneqarsinnaavoq.

Umiarsuarnillu sumiissusersiutit nittartakkatigoortut paasissutissiineri naapertorlugit, umiarsuaq Kalaallit Nunaata nalunaaqutaa malillugu 11.30 aallarpoq. Sumut angalalernera pillugu paasissutissaqanngilaq.

Umiarsuaq napparsimmaviusoq USA-p præsidentiata Donald Trumpip inoqatinut attaveqaatikkut, Truth Socialikkut, paasiuminaatsumik sapaatiummat unnukkut  allaaserereeraalu, nunatsinni ilisimaneqarnerulerpoq.

Amerikamiut umiarsuaat napparsimmavik inuppassuarnik napparsimasunik isumaginnittussaq Kalaallit Nunaannut ingerlaartoq, taanna allappoq.

Umiarsuaq napparsimmavik Kalaallit Nunaannukassasoq, Trump Truth Socialimi USNS "Mercy"-p AI-mit titartakkamik assitaliilluni allappoq.

Trumpip allagaa umiarsuaq napparsimmavimmik USNS “Mercy”-mik atitalimmik Amerikamiullu erfalasuannik erfalasortalerneqarsimasumik, AI-mit titartakkamik assiliartaqarpoq.

TV 2-p nutaarsiassiinera naapertorlugu umiarsuaq umiarsualivimmit siorna aatsaavissuaq avalappoq.

Qujaannartoq

Mobilemi Alabamamiittumi amutsivimmi marlunngornerup tungaanut aserfallatsaaliorneqarpoq.

Umiarsuaq Alabama Shipyardimut juulimi 2025-mi tikippoq, tassanilu umiarsuarnik sanaartornermik tusagassiuut gCaptain naapertorlugu ukiumi ataatsimi aserfallatsaaliorneqassaaq.

USA-p umiarsuaa napparsimmaviusoq alla aamma, USNS "Comfort", Alabama Shipyardimi aserfallatsaaliorneqarpoq.

Taanna ukiup aallartinnerani tikippoq, pilersaarutillu malillugit apriilip naanissaata tungaanut aserfallatsaaliorneqartussaalluni.

Tamanna isumaqatigiissummi USA-p illersornissamut ministereqarfiata nittartagaani takuneqarsinnaavoq.

Naalakkersuisut siulittaasuata Jens-Frederik Nielsenip Kalaallit Nunaata Amerikamiut umiarsuaannik napparsimmaviusumik tikittoqarusunnginnera sapaatiummat erseqqissarpaa.

- Maanngaanniit qujaannarpugut. Præsident Trumpip Amerikamiut umiarsuaat napparsimmavik Kalaallit Nunaannukaanniaaraa paasivarput. Nunatsinnili akeqanngitsumik tamanit atorneqarsinnaasumik peqqinnissaqarfeqarpugut, Facebookimi allappoq.

Umiarsuit USNS "Mercy" aamma "Comfort" nunarsuarmi sumiiffinni assigiinngitsuni inunnik ikiuiniarlutik atorneqartarput.

Assersuutigalugu umiarsuaq USNS "Mercy" 2024-mi Mikronesiamiippoq, umiarsuarlu USNS "Comfort" covid-19-imik napparsimasunik ikiuiniarluni 2021-mi New Yorkimiilluni.

/ritzau/