Tusarfik: Amerikamiut Jørgen Wæver illusissukkaat - namminerli tamanna ilumuunnginneraraa
Jørgen Wæver Johansenip niueqatigiinnikkut suleqatigisartagaasa Amerikamiut, 5,4 millionit koruunit atorlugit taanna nutaamik illusivaat.
Tusagassiuut Weekendavisen taama allaaserinnippoq.
Greenland Development Partners Amerikamiunik piginnittulik, Jørgen Wæver Johansenip Svend Hardenbergillu ingerlatseqatigiiffiat, Greenland Water Bank, piginneqataaffigilerpaat.
Weekendavisenip illup pisiarineqarneranut uppernarsaat, Amerikamiut ingerlatseqatigiiffiata 823.000 dollarinik New Yorkimi najugaqarfimminnit illup piginnittukuanut nuussisimanerannut takussutissiisoq, tigumminerarpaa.
Jørgen Wæver Johansenip KNR-imut allakkatigut akissutimini Amerikamiut illumik pisisimanerat ilumuunnginnerarpaa.
Sermitsiaq.AG-ip nutaarsiassiinera naapertorlugu, Jørgen Wæver Johansenip suliffeqarfiutaa, Inuit Properties Greenland, illumik piginnittutut allassimavoq. Jørgen Wæver Johansen suliffeqarfimmik tamakkiisumik piginnittuuvoq.
Jørgen Wæver Johansen KNR-imut allappoq, illu inussutissarsiorfittut atugassaq pineqarpoq.
Nuummi aasaanerani unnuiffissaaleqisarnera amerlanernit ilisimaneqarpoq. Jørgen Wæver Johansenip illumut aningaasaliinerup tamatuminnga pissuteqarnerarpaa.
- Siunertarineqartoq paasiuminarpoq: sulisutta suleqatigisartakkattalu Nuummi sulitillutik toqqissisimanartunik naatsorsuutaasinnaasumillu unnuiffissaqartarnissaata qulakkeerneqarnissaa, Jørgen Wæver Johansen KNR-imut allappoq.
Illu inuussutissarsiorfissaq kalaallinit pigineqartoq
Nunanit allaneersut Nunatsinni illuserusukkaangata, piserusuttoq nunatsinni ukiuni marlunni sulillunilu akileraartarsimanngippat, Namminersorlutik Oqartussanit immikkut akuersissut pisariaqarpoq.
Jørgen Wæver Johansen illu nammineq akiligassaralugu KNR-imut allappoq.
- Aningaasaliineq nammineq aningaasaatit atukkiinerillu erniallit qularnaveeqqusikkat akilerneqartussat ataatsimoortillugit tuniniaanermi atugassarititaasut nalinginnaasut tunngavigalugit aaqqissuussaavoq. Uanga akiitsoqarneq niuernerullu tungaatigut navianartut akisussaaffigaakka.
- Illuut inuussutissarsiornermut tunngasunut, matumani piffissami sivikitsumi najugaqarfiusussatut atorneqassaaq. Unnuiffissat nalunanngitsumik amigartillugit, pisariaqartitsiffiusunut aningaasaliinerit taamaattut tassaapput nunatta aningaasaliissutini pisariaqartitai.
Tamatuma saniatigut Amerikamiunik Greenland Development Partnersimik niuernikkut suleqateqarnini ilisimalluarneqartoq oqaatigaa.
Amerikamiunik suleqateqarneq
Piginneqatigiiffik nutaaq, Greenland Development Partners Ronald Lauderimit aningaasaliiffigineqarpoq. Tamanna tusagassiorfiup Politikenip saqqummiuppaa.
Tusagassiortut atuakkiaat 'The Divider' naapertorlugu Ronald Lauder Donald Trumpip Kalaallit Nunaannik pisinissaanik isumassarsititsisuuvoq.
Ronald Lauder Politikenip ilanngutassiaminik siorna novembarimi saqqummersitsinissaanut ullut qulit sioqqullugit Nuummukarpoq, tassanilu borgmesteri, Avaaraq Olsen (IA) ilaatigut ataatsimeeqatigaa.
Taassuma aningaasaliisinnaasut najukkamiittunut qanoq sunniuteqarluarnerpaasinnaanerat paasisaqarfigilluarusuppaa.
Jørgen Wæver Johansenip nunanit allameersunik ingerlatseqatigiiffimminut ukiut qulit missaanni suleqatissarsiorsimanini KNR-imut siorna oqaatigaa.
Kalaallit USA-mi sinniisuata taanna Svend Hardenbergilu Josette Sheeranimut - Donald Trumpip 2023-mi qinigaaqqinnginnerani attaveqalersippai.
Josette Sheeran Avaaraq Olsenip Ronald Lauderillu ataatsiminneranni peqataavoq. Taanna Greenland Water Bankimi siulersuisuisuni ullumikkut siulittaasuuvoq.
Kommuneqarfik Sermersuup ataatsimiinneq Sermitsiamut ima oqaaseqarfigaa:
- Ataatsimiinneq tikeraap isumaanut imaluunniit soqutigisaanut tapersersuinermut tunngassuteqannginnera erseqqissaatigissavaput, kommune allappoq.
Josette Sheeran Ronald Lauderimik suleqateqarnermi nunat tamalaat akornanni atassuteqarpassuaqarfiusumik aamma suliaqarpoq.
Jørgen Wæver Johansenip taassuma misilittagai atassuteqarnerilu tunngavigalugit suleqatigiinnissamik pilersitsillutik KNR-imut siorna oqaatigaa. Ingerlatseqatigiiffimmi nunat tamalaat akornanni niueruteqalerusuppoq.
Marloqiusamik najoqqutaqarneq
Amerikamiut niuernikkut atassuteqarnerat pillugu oqallinneq Naaja Nathanielsenip (IA) taamani inuussutissarsiornermut naalakkersuisuusup Jørgen Wæver Johansenimut siorna illersuineranik kinguneqarpoq.
Danskit tusagassiorfii tunngavissaqaratik Amerikamiut taassuma ingerlatseqatigiiffiannut aningaasaliinikkut politikkikkut sunniuteqarniarsarineraraat isumaqarpoq.
Tamatuma kingorna Kalaallit Nunaat - Danmarkitulli - nunanit allanit inuussutissarsiornermut aningaasaliisoqarsinnaalluni ammasumik aningaasaqarnera innersuussutigaa.
Jørgen Wæver Johansenillu oqallinneq danskit marloqiusamik najoqqutaqarneratut isigalugu KNR-imut aamma oqaatigaa.
Sulisitsisut pisortatigoortumik politikki naapertorlugu Amerikamiut suliffeqarfiinik suleqateqarneq ajornartorsiutissartaqanngitsoq aasaq aamma oqaatigaat.
Ilaasortanilli iluanaarniutigalugu akeqqanut suleqataasutut pasisaanissamik ernumassuteqartoqarpoq.
