Alternativet Danmarkimi partiini Europa-Parlamentimut qinigaatitaqanngitsutuaasoq
Europa-Parlamentimut Danmarkimi ippassaq qinersisoqarpoq.
Danskisut innuttaassusillit, danskillu kalaallillu Danmarkimi aalajangersimasumik najugallit 18-ileereersimasut qinersisinnaatitaapput.
Danmarkimi partiit tamarmik, Alternativet minillugu, Europa-Parlamentimut ikinnerpaamik ataatsimik qinigaatitaqartut taasinerit ippassaq unnukkut kisinneqareerneranni paasinarsivoq.
Taasinerit ataatsimut isigalugit partii SF qinersiseqarnerpaavoq, 17,4 procentinit taaguunneqarami.
Socialdemokratiet tulliuppoq 15,6 procentinit taaguunneqarluni.
Europa-Parlamentimut ilaasortat katillugit 720-upput, Danmarkimiillu 15-it qinerneqartussaallutik.
Kikkut qinigaasimanersut inunnut ataasiakkaanut taasinerit kisinneqareerpata tamanut ullumi ataasinngornermi saqqummiunneqarumaarput.