Alaatsinaattunngorusuttut nunat arlaliupput
Issittumi Siunnersuisoqatigiit sinnerlugit atorfillit, Katuami isumaqatigiissutissaq inaarsarlugulu ulluni kingullerni pingasuni isumaqatiginninniassutigaat. Isumaqatigiissut aqagu atsiorneqassaaq, nunanut allanut tunngasunut ministerit pisortatigoortumik siullerpaamik inatsisitigut pituttuisumik Issittumi Siunnersuisoqatigiit 1996-mili pilersinneqarnerata kingorna atsiugaqarunik.
Issittumi Siunnersuisoqatigiinnut alaatsinaattunngussaagaani akiliuteqartoqartalissasoq, atorfillit isumaqatigiissuteqarfigaat. Aningaasat qassit akiliutigineqartalernissaat, suli aalajangerneqanngilaq.
Piumasarineqarportaaq, alaatsinaattut issittumi siunnersuisoqatigiinnut soqutiginnillutik suleqataarusussuseqassasut, aamma nunat tamalaat inatsisiliaat aamma malissagaat.
Issittumi Siunnersuisoqatigiit 1996-imi pilersinneqarmatali, alaatsinaattuujuarsimapput Pinngortitaq Pillugu Nunarsuaq Tamakkerlugu Suliniaqatigiiffik, WWF-imik naalisarneqartoq. WWF-imi sila pillugu immikkoortortarfiup pisortaa, John Nordbo aperaarput alaatsinaattuunertik qanoq atorsinnaasarneraat.
- Qularutissaanngilluinnarpoq maannakkut alaatsinaattuusut, suliniaqatigiiffinneersut nunanillu allaneersut tunniussinnaasaminnik ilisimasarpassuaqassasut.
WWF-ip ilanngullugu nassuiaateqarfigaa, sooq Issittumi Siunnersuisoqatigiinnut ilaasortaaneq akilersinnaannersoq.
Avatangiisinik illersuiniaqatigiit Greenpeace Issittumi Siunnersuisoqatigiinnut alaatsinaatsuusinnaannermut 2009-mili qinnuteqarsimapput. Greenpeacekkut suli nunat soorlu Kinamiit Europamiillu, alaatsinaatsussatut qinnuteqarsimasutuulli suli akuerineqarsimanngillat.
Jon Burgwald Greenpeacemeersoq, isumaqarpoq Issittumi Siunnersuisoqatigiit alaatsinaattunngortitsinissaminnut matoqqavallaartut.
- Uuliali eqqarsaatigalugu naalagaaffiit alloriarusussuseqannginiissaat uanga paasinninnera malillugu ilimagara. Ajutoornerli pippat ataaseq isumaqatigiissutigineqarsinnaasoq tassaavoq, ajutoornerup annikillisinneqarnissaa pillugu suleqatigiinneq uuliaarluarnerullu kingorna suleqatigiilluni saliineq tamanna pisinnaappat. Allarluinnaavoq maleruagassaliorsinnaaneq taamaalilluni ajutoorneq pinngitsoorneqarsinnaaqqullugu, Jon Burgwald, ataatsimeersuarnermut peqataajartortoq oqarpoq.
Soorlu Issittumi siunnersuisoqatigiit kissaatigineqartutuut inatsisitigut toqqammavissaqassagunik taava ammasuunissaq pingaaruteqarpoq. Kisianni ammaneruleriartortoqarpoq sulimi takuneqarsinnaavoq EU Kinalu avataaniitinneqartut. Tamannalumi pisariaqarluinnarpoq assigiinngisitaarneq kisaatigineqartoq anguneqassappat.
- Oqaatsit asuliinnaassappata taava alaatsinaattut qassit peqataanerat isumaarutissaaq, taamaassimappammi Siunnersuisoqatigiit pisariaqartinneqarsimassanngillat. Maanna taakku takutittariaqalerpaat ajornartorsiummik pingaartitsinertik, Jon Burgwald oqarpoq.
