Akuersaanngilluinnarneq aalajangiusimaneqarli

Ataatsimoorluni kaammattuuteqarnissamik aaqqissuisuupput Avataq, NOAH Friends of the Earth Danmarkimeersoq aammalu Akuutissalersuinngitsumik Periaaseqarnermi Siunnersuisut. Suliniaqatigiiffiit naalakkersuisutiguunngitsut (NGO-t) katillugit nunanit 27-ineersut kaammattuuteqarnermi tunuliaqutarineqarput.

- Kuannersuit uranimik piaaffigineqarnissaannik pilersaarutit tailingsinik (eqqagassanik) tonsinik millionilinnik kinguneqartussaapput, taakkulu aatsitassanik qinngornerinik ulorianarnerpaanik akoqartussaassallutik. Eqqakkat ukiuni tuusintini hundredelinni qinngornernik ulorianartunik akoqaannavittussaassapput, siunissarlu ungasinnerusoq eqqarsaatigalugu mingutsitsinermik annertuupilussuarmik kinguneqarsinnaallutik, peqqissutsimullu navianaataa pissutigalugu Kujataata ilarujussuani nunalerineq, aalisarneq, piniarneq uumasuuteqarnerlu inerteqqutigineqartariaqassalluni, aamma sumiiffimmi tassani najugaqarnissaq peqqissutsimut navianaateqarsinnaassaaq, Mikkel Myrup, Avatami siulittaasoq oqarpoq.

Suliniaqatigiiffiit 48-t allakkiaminni oqaatigaat uranimik piiaanerup kingorna saliinissaq Kalaallit Nunaata aamma Greenland Minerals and Energyp akissaqartinngeratarsinnaagaat, danskillu naalagaaffiat aningaasatigut qularnaveeqqusisisimanngitsoq.

Aammattaaq atomip nukinganik suliffissuaqarnerup atomillu nukinganik qaartartuliornermik suliffissuaqarnerup uraninik pisisartuuneri uparuarpaat, suliffissuaqarfiimmi taakku Kalaallit Nunaata Danmarkillu siuarsaneqarnissaannut peqataasariaqanngillat.

Atsioqataasut ilagaat ICC, Greenpeace aamma WWF.