Akerliussutsimik takutitsisut politikerinit soqutigineqanngitsut

Arfininngornermi takutitsinermi inuit 20-t peqataapput. Sørine Petersen aamma Kirsten Frederiksen aaqqissuisuupput. Ingerlaaqatigiit Amisuniit nalunaaqutaq marlunut aallartipput,  ataatsimoorlutillu Inatsisartut ataatsimiittarfiata tungaanut ingerlallutik.

Nunaqavissutut pitsaanerusumik atugassaqartitsisoqarnissaa piumasarivaat.

Politikkerit takkutinnginnerat peqataasunit pakatsissutigineqarpoq. Peqataasullu oqariartuutigivaat soqutigineqanngitsutut isigineqarnertik, normu 2-tullu inissinneqartuarnertik.

– Kanngunat, akerliussutsimik takutitsisut suaartarput.

Akerliussutsimik takutitsisut oqaatigaat, kalaallit nunaqavissut ilinniarsimagaluarlutik  suliffissarsioraluaraangamik atorfissaqartinneqarneq ajorlutik.

– Ilinniagaqarnissatsinnik kaammattorneqarpugut, kisianni ilinniakkamik naammassinnereerluta atorneqanngilagut, peqataasut ilaat oqarpoq.

Peqqinnissaqarfik artorsarpoq, aamma sulisussanik tikisitsisoqartarpoq, taakkulu sivikitsumik nunatsinniittarlutik. 

Akerliussutsimik takutitsisut naapertorlugit tamanna nunaqavissunut kinguneqartarpoq. Ilaatigut suliffimmi atugassarititaasut ajornerulernerannik kiisalu akissarsiat ikinnerulernerinik.

Naalakkersuisut siulittaasuat toqqaannartumik aamma isornartorsiorneqarpoq.

– Inuiaqatini ukkatarinagit Danmarkimi angalasarpoq, peqataasut ilaat oqarpoq.

Aalisartunut atugarititaasut aamma suliffnni atugassarititaasut kiisalu akisassarsiarineqartartut amerlisassaanngitsut eqqartorneqarput, taamatuttaaq inissaaleqineq aamma oqaatigineqarluni.