Akerliussutsimik takutitsisut: “Meeqqamik tigumminninnissaq inuit pisinnaatitaaffigaat”

Danmarkimi kalaallit meeqqat angerlarsimaffiup avataanut inissinneqartarnerat pillugu nunatsinni, Danmarkimi, Islandimi Savalimmiunilu decembarip qulingani marlunngornermi ualikkut akerliussutsimik takutitsisoqarpoq.
Akerliussutsimik takutitsisut Københavnimi Christiansborgip saani akerliussutsimik takutitsisut naneruuserlutik ammalortorujussuanngorlutik, kalaallit erfalasuannik, allagartarsuarnik tigummiarlutik katersuupput.
“I shouldn't be protesting against stealing children” (Meeqqakka tillinneqarsimasut pillugit akerliussutsimik takutitsinissaq pisariaqartariaqanngikkaluarpoq, aaq..) allagartami nammineq suliami ammalortup qeqqanut inissinneqarsimasumi allassimavoq.
- Akerliunerput attatiinnarusupparput, angusaqarnissatta tungaanut attakkusupparput. Pissutigalugu angajoqqaanut meeqqanullu misissuutit ukua kalaallinut tulluarsagaanngitsut piaarnerpaamik unitsinneqarnissaat pingaaruteqarluinnarpoq, Laila Berthelsen, peqatigiiffimmi MAPI-mi siulittaasoq, Københavnimi akerliussutsimik takutitsinermi aaqqissuisuusoq, oqarpoq.
Qaammatip ataatsip ingerlanerani pingajussaanik akerliussutsimik takutitsisoqarpoq. Taakku danskit kommuniisa angajoqqaat piginnaasaannik misissuutip (FKU-p) kalaallinut ilaqutariinnut Danmarkimiittunut atorneqartarunnaarnissaa piumasaqaatigaat.
Misissuummi kalaallit kulturiannut naleqqussarsimanngilaq. Taamaammat peqatigiiffiit suliniaqatigiillu arlallit, matumani Inuit Pisinnaatitaaffii pillugit Insituttip tamanna mianersoqqussutigaat, kalaallimmi meerartaannik inissiineq kukkusumik tunngavilerneqarsinnaammat.
Naalakkersuisut Christiansborgiliariartortut
Suliaq kalaallit politikeriisa akornanni aamma aalassassutigineqarpoq.
Meeqqanut inuusuttunullu naalakkersuisup Aqqaluaq B. Egedep (IA), naalakkersuisullu siulittaasuata Múte B. Egedep, Danmarkip isumaginninnermut ministeria Sophie Hæstorp Andersen sapaatit akunnerata massuma ingerlanerani ataatsimeeqatigissallugu Danmarkimukariartorput.
Akerliussutsimillu takutitsisut ersarissumik oqaatiginiagaqarput:
- Inatsit iluarsillugu tuaviuullugu ataatsimiissutigisariaqarpaat, Aviaq Petersen, akerliussutsimik takutitsinermi peqataasoq oqarpoq.
- Isornarluinnarpoq. Folketingimi aningaasanut tunngasut allat tuaviuussamik suliarineqartarput. Sooq suliaq una tuaviuunneqanngila? taanna aperivoq.
Kuluk Helms akerliussutsimik takutitseqataasoq isumaqataavoq.
- Nammineq meeqqanik tigumminninnissaq inuit pisinnaatitaaffigaat. Neriuppunga meeqqat kulturi pillugu peerneqarnissaannut malittarisassat allanngussasut.
- Danmarkimi meeqqat pinngitsaaliissummik nuutsinneqartarnerat inuit atugarissaarnerannut naapertuuttuinnaaneq ajortoq isiginiarneqalissasoq aamma neriuutigaara, taanna oqarpoq.
Laila Berthelsen ukiuni kingullerni kalaallinut angajoqqaanut inissiisoqarneranut suliani arlalinni ikorfartortaasimasup massakkut iliuuseqartoqartariaqartoq oqaatigaa.
- Politikerit qanoq iliuuseqassanersut naluagut. Kisianni iliuuseqarnissaannut FKU-llu kalaallinut ilaqutariinnut atorneqartarnera eqqortuunngitsoq aalajangiutissagaat neriuutiginarpoq, taanna oqarpoq.
Zammi
Danmarkimi Thisted Kommunimi suliaq aallaavigalugu akerliussutsimik kingullermik takutitsisoqarpoq, kalaallip Keira Alexandra Kronvoldip meerartaaminik Zammimik qaammammi matumani arsaarneqareernerani taamaaliortoqarluni. Oqaluttuaq tamanna Sermitsiap saqqummiunnikuuaa.
Keira Kronvold panini Zoe, maanna peroreersoq, angerlarsimaffiullu avataanut aamma inissinneqarnikuusoq, peqatigalugu akerliussutsimik takutitseqataavoq.
- Inissiineq uannut kingunerlutsitsivoq. Assigiinngisitsiffigineqarpunga. Tamannalu ajorluni, Zoe Kronvold oqarpoq.

Taamaammat Zoe Kronvoldip akerliussutsimik takutitsinerit nukkaminut allannguiffiusinnaassasut neriuutigaa.
- Nukkama juullertinnagu angerlarsinnaanissaa neriuutigaara, Zoe Kronvold oqarpoq.
“Zammi,” arnaa, Keira Kronvold, Slotspladsimi tusaaneqarsinnaaniassagami torlulaartaatikkut suaartarpoq.
“Zammi,” akerliussutsimik takutitsisut ataatsimoorlutik suaaqqittarput.