Aka Hansen: Aki-Matildap Folketingimi suliai naammasserusukkai

KNR-ip Aka Hansen Inatsisartut silataanni marlunngornermi silami nillertumi seqinnarissumili naapippaa.

Folketingimut kingusinnerpaamik halloweenimi tassa ukioq manna oktobarip 31-anni qinersisoqassaaq.

Qinersineq qiiaamminartuussanersoq suli ilisimaneqanngilaq, qineqqusaarnerli Danmarkimi aallartikannereerpoq.

Aka Hansen politikerini qinigassanngortilluni pisortatigoortumik nalunaaruteqartuni siulliuvoq; taannalu Siumut tunuliaqutaralugu qineqqusaassaaq.

Taassumali Siumumit pingaarnertut qinigassanngortittuunerluni ersarissumik 'aap'-imik akerusunngilaa.

- Allanik qinigassanngortittoqassaaq, taakku ulluni imaluunniit sapaatini akunnerni aggersuni saqqummiukkumaarpagut. Taamaammat qinigassanngortittuni kisimiinngilanga.

Piffissanngortoq

Amerlanerpaat ilisimasaattut Aka Hansen filmiliortartuuvoq, taassumali atorfimminik allannguinissani maanna piareersimaffigaa.

- Nunatsinni pissutsit soqutiginarluinnartuusut isumaqarpunga, pissutigalugu nunarput maannakkut sammineqangaatsiarpoq. Taamaammat piffissaq oqaluttuarisaanermi soqutiginarluinnartuuvoq.

Naak taanna politikkimut aatsaat soqutiginnilinngikkaluartoq ilaquttani eqqarsaatigalugit aatsaat nukissaqarluartutut misigisimavoq.

- Nammineq inuuninni meeqqat marluk kisermaappakka. Maanna allingaarmata politikeriunissamut piffissannik atuisinnaasutut misigisimavunga, taanna oqarpoq.

Aki-Matilda Høegh-Dam (N) Siumut sinnerlugu 2022-mi qinigassanngortikkami qinersinermi taaguunneqarnerpaavoq, tassa 6.670-init taaguunneqarpoq; Aaja Chemnitz tulliulluni 2.374-init taaguunneqarpoq. Assi © : KNR / Markus Valentin

Aka Hansenip namminersorneq naalagaaffinnillu pilersitsineq pingaartitaralugit oqaatigaa.

Taamaammat tamanna tunngavigalugu Siumut ilaatigut toqqarpaa.

Taassumali inatsisitigut isumannaatsuuneq aamma pingaartitarissavaa, susassaqarfimmi tamanna Danmarkip akisussaaffigaa.

- Pisinnaatitaaffigut pillugit saqqummiiuarpunga, inatsisitigullu isumannaatsuunissarput uannut pingaaruteqarpoq.

Siulima suliai imaannaanngitsuusut

Folketingimut 2022-mi qinersisoqarmat Siumut qinerneqangaatsiarpoq.

Tassani Aki-Mathilda Høegh-Dam partiimut taasisut 34 procentingajannik taaneqarluni ajugaavoq. 

Aaja Chemnitz (IA) 22 procentingajannik taaneqarluni tulliuvoq, Anna Wangenheim 17,6 procentinik taaneqarluni pingajuuvoq.

Aka Hansen qineqqusaaleruni Aki-Mathilda Høegh-Damitulli assingusunik anguniagaqassannguatsiarpoq.

Siumut tunuliaqutaralugu sassarnissaq pingaaruteqartoq Aka Hansen (S) oqaluttuarpoq: - Siumup naleqartitai uannut tulluaramik, tassani ingammik namminiilivinnissarput naalagaaffinngornissarpullu sullinnerat uannut pingaaruteqarmat, Aka Hansen oqaluttuarpoq. Assi © : KNR / Markus Valentin

Qinikkani siuttuusimasoq folketingimut qineqqusaaqqinniarnani 2023-mili oqaatigaa.

Aki-Mathilda Høegh-Dam Naleqqamut taamanili nuuppoq, Inatsisartunullu qinigaalluni.

Aki-Matilda Høegh-Damilu qanoq assigiinngitsigivisi imaluunniit assigiiffeqartigivisi? 

- Aterput assigiingajappoq. Kisianni soorunalimi aamma politikikkut pingaartitavut assigiingajapput, Aka Hansen nuannaarpasilluni nangilluni oqarpoq:

- Kisianni Aki-Mathilda nersorneqassaaq suliai pingaaruteqaramik. Sulialli naammassinngillat, taamaammat uanga ingerlateqqikkusuppakka soorunalimi Siumup massakkut pingaartitai malillugit.

Kikkut taasinerpaassasoraagit. Demokraatermiut/IA-kkormiut imaluunniit Naleqqakkunnut qaninnerua?

- Taakkua uanga naluakka, inuiaat taasiartornissaat pingaarnerpaajuvoq. Taasisussat namminneq toqqarumaarpaat kina inissikkusunnerlugu, kisianni soorunalimi sassarpunga tunniussassaqarama, taanna oqarpoq.