Air Greenlandip qulimiguullit uuliasiornermut atugassatut naatsorsuussat suli tigunagit tuninialerpai
Taamallu pisoqanngilaq, akerlianillu uuliasiortut arlallit Kalaallit Nunaanni ingerlataminnik kinguartitsipput allallu annikillisaallutik. Tamannalu tunuliaqutaralugu qulimiguullit taakku tuniniarneqarnissaat Air Greenlandimi siulersuisut ullumi ataatsimoorlutik aalajangiuppaat.
- Qulimiguulinnik sanaartorneq sivisuumik pisarmat aammalu sinerissap avataani uuliasiortut ingerlataminnik annertusaanissaat naatsorsuutigalugu, 2011-mili qulimiguullit inniminneerpavut. Uuliasiortut attavigiuarsimavagut uuliasiornerullu qanoq ingerlanera qanimut malinnaaffigalugu, ajoraluartumillu paasinarsivoq qulimiguullit 2014-mi tamakkiisumik suliassaqartinneqassanngitsut. Ukiunilu tulliuttuni allanngortoqarnissaa ilimananngimmat qulimiguullillu taakkorpiaat nunatsinni atuisussaqaratik, aningaasartuutinik assersuutigalugu inuttat sungiusartinneri, kingoraartissat il.il. atuilinngitsinni ingerlatsivittut akisussaassusilimmik iliuuseqarluta pissutsinut naleqqussarpugut, siulersuisunut siulittaasoq Jens Wittrup-Willumsen nassuiaavoq.
Air Greenlandip naatsorsuutigaa qulimiguullit EC225-it ajunaaruteqarani tunissallugit.