Air Greenland naatsorsuutigisaminit annikinnerusunik sinneqartooruteqartoq

Neriuutigineqartutulli pitsaatiginngillat, timmisartuutileqatigiiffiulli oqarnera naapertorlugu Air Greenlandip siorna aningaasaqarnera eqqarsaatigalugu ajunngillat.

- Air Greenlandip suliffeqarfissuani 2023-mi ukiumoortumik angusat akileraannginnermi 84,5 millionit koruuninik amerlassuseqarput, taakkulu ukiup siuliani, tassalu 2022-mi angusanit 8 millionit koruuninik pitsaanerupput, kisiannili ukiumi angusassatut naatsorsuutigisatsinnit ikinnerullutik, Air Greenlandimi siulersuisut siulittaasuat Bodil Marie Damgaard tusagassiuutinut nalunaarummi oqarpoq.

Siulersuisut siulittaasuata aningaasat kaaviiaartitat amerlisimanerat oqaatigaa, tamannalu pingaartumik timmisartumut ilaasut 40.000-t sinnerlilaarlugit amerlisimanerannik pissuteqarpoq. 2022-mi ilaasut 416.000-iusut 2023-mi 459.000-iupput.

Muminganillu orsussup akiata qaffasinnera taamaatitsiinnarnermilu ineqartitsinermut nerisaqartitsinermullu aningaasartuutit aningaasartuuteqartitsipput. Air Greenlandillu oqarnera naapertorlugu kingulliullugu taaneqartumut aningaasartuutit siunissami ajornannginnerulernissaannut takussutissaqanngilaq:

- Taamaatitsinerit amerlanersaat Kalaallit Nunaatsinni silarlunneranik, silap pissusiata allannguutaatut taagulersinnaasatsinnik peqquteqartarput. Kangerluit sikuneri, sikorsuit ingerlaarneri, pujoq anorillu timmisartuussinitsinnut akulikinnerusumik sunniuteqartalerput, aammalu siornatigumut naleqqiullugu timmisartuussinernik amerlanerusunik taamaatitsisariaqartalerpugut, Bodil Marie Damgaard oqarpoq.

Air Greenlandili siunissamut isumalluartoq timmisartuutileqatigiffiup tusagassiorfinnut nalunaarutaani atuarneqarsinnaavoq. Atlantiku qulaallugu timmisartumik nutaamik, qulimiguulinnillu amerlanernik pisineq ilaatigut taakkartorneqarput, soorlu aamma Nuummi mittarfittaassaq ukioq manna kingusinnerusukkut ammarneqartussaq isumalluarfigineqartoq.

Air Greenlandilu tassani timmisartuutileqatigiiffinnit allanit unammillerteqalersinnaassaaq, tamannali timmisartuutileqatigiiffiup piareersimaffigigaa pisortap, Jacob Nitter Sørensenip oqaatigaa:

- Ukiut kingulliit marlussuit eqqarsaatigalugit pisorpassuaqarsimammat, Air Greenlandip suliffeqarfissua unammillerneqaleruni piareersimanissaa qularinngilara, pisortaq tusagassiuutinut nalunaarummi oqarpoq.

Air Greenlandip ukiumoortumik naatsorsuutai suliffeqarfiup maajip ulluisa 13-ianni ataatsimeersuarnissaani pisortatigoortumik saqqummiunneqarumaarput.