Aatsitassarsiorfik danskinik kalaallinillu aningaasalerneqartoq nutaamik isumaqatigiissusiornikkut innuttaasunut iluaqutaassasoq

Najugakkani sulisartut, ukiumut ikinnerpaamik 250.000 koruuninik tapiissuteqarnerit ilinniartussaatitaanerlu.  

Tamakkuupput aatsitassarsiorfiup Greenland Anorthosite Miningip kujataani aatsitassarsiorfitsik pillugu, naalakkersuisut Kommuneqarfillu Sermersuup isumaqatigiissuteqarfiginerisigut pisussaaffeqarfigiligaasa ilaat. 

Aatsitassarsiorfik tusagassiuutinut nalunaarummi allappoq. 

- Aalajangigassat pingaarutillit inissippagut, tassaasut: akuersissutit, oqartussanik suleqateqarneq IBA-millu isumaqatigiissut tassa suliniutip najukkami tunngavilerneqarnissaanik qulakkeerinnittussaq, pisortaaneq Claus Stoltenborg tusagassiuutinut nalunaarummi taama oqarpoq. 

Kujataani Qeqertarsuatsiaat Kangerdluanni aatsitassarsiorfeqarnermit ingerlatseqatigiiffik anorthositinik, tassa E-glasfiberinik sanaartornermut atorneqartartunik, piiaasinnaalissaaq.  

- Taamaalilluni aatsitassarsiorfipput danskinit ingerlanneqartoq Kalaallit Nunaanni siullerpaajussaaq. Tamanna suliniutip eqqaani najugallit aaqqissuussamik akisussaassusilimmillu ukiuni qulikkuutaani qanimut suleqatiginerisigut piviusunngorpoq, Claus Stoltenborg oqarpoq. 

Nunani tamalaani aningaasaateqarfiup Jean Boulle Groupip Greenland Anorthosite Miningip 31 procentia pigivaa. Saniatigullu danskit aningaasaliinissamut aningaasaateqarfiata EIFO-p, Nalik Venturesip SISA-llu katillutik 15 procentiat pigaat kiisalu Arbejdernes Landsbankip 3F-illu katillutik 12 procentingajak pigalugu.

Nunatsinnut iluaqutaasussaq

IBA-mut isumaqatigiissutip (Impact Benefit Agreement) atsiornerata Greenland Anorthosite Miningip (GAM) anorthositinik piiaanissaanut qaninnerulersippaa. 

IBA-mut isumaqatigiissutip ingerlatseqatigiiffiup suliaat innuttaasunut iluaqutaanissaat qulakkiissavaa

- Sanaartornerup tunisassiornerullu nalaani sulisut ikinnerpaamik 40 procentii najugaqartuussapput. GAM-ilu ilinniartitaanermut aningaasaliillunilu, najugaqartut nioqqutissanik pilersuisartut sullissisartullu atussavaat aammalu najugaqarfimmi ilinniartitaanermut, kulturimut timersornermullu ukiumoortumik tapiissuteqartassalluni, ingerlatseqatigiiffik tusagassiuutinut nalunaarummi allappoq. 

Ingerlatseqatigiiffik ilinniartitaanermut ukiumut 70.000-it 250.000 koruunillu akornanni aningaasaliisarnissaa aamma ilinniartitaanikkut, kultureqarnikkut timersornikkullu siunertanut ukiumut 250.000 koruuninik tapiissuteqarnissaa isumaqatigiissummi allaqqavoq, tamannali aatsitassarsiorfik aatsaat iluanaaruteqartalerpat pisinnaapput. 

- Kalaallit piginneqataanerminni aningaasaliissutaat suliniutip ineriartortinneqarneranut sivisuumillu naleqalersitsinermut toqqaannartumik ilaapput, ingerlatseqatigiiffik tusagassiuutinut nalunaarummi allappoq:  

- IBA-mut isumaqatigiissutip najukkani suliffissat, ilinniartitaaneq pilersuisullu pillugit piumasaqaatai, suliniutip Kalaallit Nunaanni aningaasatigut tunngaveqarneranut nukittorsaataapput. 

Greenland Anorthosite Miningip aatsitassarsiorfiup 2027-mi sanaartorneqarnissaa anorthositillu suleqatinut 2030-mi nassiuttalernissaat naatsorsuutigaa.  

Anorthositinik toqqorsivik naleqaqisoq

Greenland Anorthosite Miningimit oqartoqarnera naapertorlugu, kujataa ‘nunarsuarmi anorthositeqarnerpaavoq’. 

Aatsitassat qaqortut qasertullu glasfiberiliornissamut atorneqarsinnaapput, taakkulu anorisaatit, biilit timmisartullu atortussaannik oqinnerusunik sivisunermillu atorsinnaasunik sanaartornissamut atorneqarsinnaapput.  

Ingerlatseqatigiiffimmit oqartoqarnera naapertorlugu, tamanna taakku tunisassiarineqarneranni allat tunisassiarineqarnerininngaanniit CO2-mik aamma aniatitsinnginnerupput. 

- Ingerlatseqatigiiffiup nammineq misissueqqissaarneri naapertorlugit anorthosit piiarneqartoq E-glasfiberinut atorneqarneqarsinnaasoq minguinnerpaaq naleqqunnerpaarlu, GAM-ip siuarsarnissaanut periarfissiivoq. Taamaalilluni ingerlatseqatigiiffik mingutsitsinnginnerusumik atortunik nunarsuarmi pilersuinermini siuttunngorsinnaavoq, ingerlatseqatigiiffik tusagassiuutinut nalunaarummi allappoq. 

Greenland Anorthosite Miningip akuersissutini amigaataa tassaavoq Aatsitassarsiornerup matunissaanut pilersaarut (Mine Closure Plan). Saniatigullu aamma ingerlatseqatigiiffiup sanaartornissamut aningaasaliissutit qulakkeerneqarnissaat suli sulissutigaa.