Aviaja Rakel angakkutut sulisoq: Aatsaat taama soqutigineqartigaaq

Aviaja Rakel Sanimuinaq Kristiansen Nuummi illoqarfiup qeqqani illumi aappalaartumi angakkorsarluni naammassilerpoq.  

Nerriviup qaaniittumi qullermi ikumasumi issuatsiamerngit qajaasartaasa tikkat illup iluani naassaavoq.

Aviaja Rakel Sanimuinaq Kristiansen ullormut sulingaatsiarsimagami anersaammilluni ingippoq. Seqineq pukkilereersimammat qilak aappillarippoq.  

Aviaja Rakel Sanimuinaq Kristiansenip suliffia qaqutigoorpoq. Taannami angakkutut sulivoq.

Taassuma sullitai ukiuni marlunni kingullerni aalaakkaanerulersimapput aatsaallu taama soqutigineqartigilerluni.

Aviaja Rakel Sanimuinaq Kristiansen naapertorlugu ullormut marluk sisamallu akornanni sullitaqartarpoq, sulittagaalu nunatsinneersuupput nunaniillu allaneersuullutik.

Taanna Instagrammimi 7.500-nik malinnaasoqarpoq.Taassuma sullitaasa ilai Nunavumeersupput, Australiameersut aamma USA-meersut. Soorunalimi aamma nunatsinni illumi aapplaartumi allaffittaamini sullitaqartarpoq.

Aviaja Rakel Sanimuinaq Kristiansenip allaffittut taagugaani natermi nannup amia siaarsimavoq. Iikkami qilaatip saniani tulukkat, naajat nattorallillu suluisa meeqqui angisuut nivingapput.  

Teqeqqumi nerrivimmi puisip niaquata saarnga ippoq, niaqqullu saarnga anneq sualunnik umimmaanneersunik aarrineersunillu ilalik natermiippoq.

Tamakku tamarmik Aviaja Rakel Sanimuinaq Kristiansenip angakkutut ulluinnarni sulinerani nukissaqartitsipput.  

Angakkutut Rakelimik imminut taagorpoq.

- Rakel tarnima ilagaa uanga iliuuserinngisannik naammassisaqartartoq. Tammartarpunga. Pissaanerujussuit tikilluaqqujumallugit suujunnaartarpunga.  

Aviaja Rakel Sanimuinaq Kristiansen eqqissilluni oqaluttuarpoq.

Angakkup nutaanerusup sulerisarneranik aatsaat nassuiaalinngitsoq malunnarpoq.

Inuiaqatigiinni allaanerusoq

Angakkunngorniarneq imaannaasimanngeqaaq. Upperinninngitsut suli naapittarpai – aamma nunatsinni.   

Nunatsinni innuttaasut 95 procentii ilagiinni naalagaaffimmit tapersersorneqartumi ilaasortaapput aperineqartaqaarlu: ilumut angakkoqarpa?   

Aviaja Rakel Sanimuinaq Kristiansenimullu akissut ersarippoq. Taassuma nammineq timimini malugisarpaa.

Qilaatersorluni anersaat silarsuannut pigaangami aneersaat naapittarpai.

Taassuma timimini ukiorpassuarni annilaangajuarnini qaangerniarlugu Inuit qanga upperisaannut ikioqqusarsimavoq.

Namminerlu nassuiaavoq inuiaqatigiinnut akuusinnaasimanani.

- Peqqissinngisaannassasunga inuunermalu sinnera eqqarsartaatsikkut nappaateqassasunga paasitinneqarpunga.

Inuilli qanga upperisaanni ukiut aqqanillit matuma siorna akissutissarsivoq.

38-nik ukiulik Aviaja Rakel Sanimuinaq Kristiansen ukiut arfinillit matuma siorna Søborgimi inimini qilaatersorluni anersaat silasuaannut angalaqqaarsimanerarpoq.

Qilaatersorluni anersaat silarsuannut angalanera minutsini 20-ni sivisussuseqarpoq inuuneralu allanngorluni.

- Taamanili annilaangasutut allatulluunniit ersissuteqartutut misigeqqinngilanga, taanna oqaluttuarpoq.

Ajorunnaarsitsinermut tunngasoq

Aviaja Rakel Sanimuinaq Kristiansenip nassuiaanera naapertorlugu angakkup suliassaa tassaavoq tarnermik ajorunnaarsitsinissaq.  

Ikioqqullutik takkuttut sooq aggernersut apereqqaartarpai sunillu kissaateqarnersut paasiniartarlugu. Taava ajorunnaarsitsinissamik sulineq aallartittarpoq.

Ikioqqusup timimini tarnerminilu sunik anniaateqarnera aamma sooq taamaattoqarnersoq siulii aqqutigalugit Aviaja Rakel Sanimuinaq Kristiansenip maluginiartarpai. Siulimmi tassaapput anniaatinik piaasussat.

Siuaasat qanoq peqataanerat aamma qilaatersorluni anersaat silarsuaanni susoqartarnersoq paasiniaraanni nammineq misigisariaqartoq taanna oqarpoq.

Angakkorsarnerulli siunertaa pillugu apeqqummut akissutaa ersarippoq.  

Aviaja Rakel Sanimuinaq Kristiansenip akulissi tikkuarpaa. Kakiornerit tunniit tassaniipput, tassaallutik titarneeqqat marluk.

- Imminut ajorunnaarsinnissaq pineqarpoq. Timi, isuma aamma tarneq imminnut ataqatigiipput. Tarneq tassaavoq nukik, oqimaaqatigiisitsinissarlu anguniarlugu tarneq nukimmik pisariaqartitsivoq.   

- Angakkorsarneq imminut suliarinermi qamuuna iluaqutaasarpoq, taamatullu isummakkut pissutsip allanngortinnera iluaqutigalugu malugisinnaasat malugisinnaanngisalluunniit iserfigiuminarnerusarput. Taakku marluk malugisinnaagaanni oqimaaqatigiissumik inuusoqarsinnaavoq.

- Suna tamarmi silamut tunngavoq. Silarsuup sianissusaa. 

Nammineerluni ilinniartoq

Aviaja Rakel Sanimuinaq Kristensenip nammineq qanoq angakkunngorsimanini aalajangersimasunuinnaq oqaluttuarisinnaavaa.

- Suna tamaat oqaluttuarisinnaanngilara. Anersaat uagutsinnut attaveqariaasiannut tunngavoq, taanna oqarpoq.

Taassumali oqaluttuarisai angakkut pillugit oqaluttuatoqqanut eqqaanarput.

Aviaja Rakel Sanimuinaq Kristensenillumi ilaqutaasa Ittoqqortormiineersut siuaavi angakkortaqarsimapput.

Taamaakkaluartorli angakkut silarsuaat nammineq nassaariniarsimallugu oqarpoq.

- Namminerli ilinniarnera kigaassimaqaaq, pikkunarluni pissanganaqalunilu. 

- Taamaaliornikkut kinaaninnik, kikkuunitsinnik susinnaanitsinnillu paasiniaanissannut nukissaqartorujussuanngorpunga. Ilimagisatsinniimmi piginnaasaqarnerujussuuvugut, siulittalu periuuserisimasaannik paasiniaalluni tulluusimaarnaqaaq. Kulturerpummi nukinnik puilavoq.  

Aviaja Rakel Sanimuinaq Kristensenip qulleq qiviarpaa qaqortumillu mikisumik taqqissuuserluni qulleq taqqissulerpaa. Taqqissutaa taassaavoq nannup usuata saarngisa ilaat.

Inuit amerlanerusut qanga inuit upperisaannik aallutaqarnerulerumaartut taanna neriuppoq.  

Nunasiaatigineqalernerummi kingunerissaanik kulturimut tunngasut ilai atugaajunnaarput. Pingaartumik tunumi, Aviaja Rakel Sanimuinaq Kristiansen Ittoqqortormiini peroriartortoq isumaqarpoq.

Nunasiaataalerneq kinguaariippassuunngitsut matuma siorna aallartippoq.  

- Inuiaqatigiiuvugut anersaaleriumatuut qilalersut, taanna oqarpoq. 

Arnaq alla matukkut kasuttorpoq.