Bent Salling: Aasianni tunisassiorfiup siunissaa ima allanngortinneqarsinnaavoq
-Sulisunut sunniuteqarnissaa annikinnerpaamiitinniarsarivarput. Taamaalilluta siammarniarsarivarput fabrikkip suliassaqartinniarsarinera,
Bent Salling, Polar Seafoodimi pisortaq taama oqaluttuarpoq.
Suliffeqarfiup raajanik pisassiissutit qaammat ataaseq sioqqullugu tamakkerneqarsimanerat pingasunngornermi nalunaarutigaat. Tamanna pissutigalugu tunisineq aggustip 15-iannit unitsinneqarpoq. Taamaattorli montagui-raajanik misileraatigalugu aalisarneq aggustip 15-iannit septembarip ulluisa aallaqqaataata tungaanut ingerlavoq.
Bent Sallingip Polar Seafoodip Aasianni tunisassiorfiata siunissaa pillugu inissisimaffik maanna oqaluttuaraa.
Tunisassiorfiup siunissaa
Polar Raajat Aasianni tunisassiorfia matussanersoq ukiup ingerlanerani allaaserineqangaatsiarpoq.
Bent Sallingip tamanna suli aaqqiissutissarsineqannginnera oqaluttuaraa. Neqeroorusiortitsinerulli immikkoortuisa aappaat, qaleralinnik saarullinnillu pisassiissutinik agguaassiffiusussaq, aggustip 21-anni aalajangiiffigineqassasoq kingullertut nalunaarutigineqarpoq
Ingerlatseqatigiiffik ingerlatseqqinnissaq qulakkeerumallugu tamatuma kingorna pilersaarusiussaaq.
Naak suli aalajangiisoqanngikkaluartoq, pisortap naalakkersuisut Aasianni tunisassiorfimmut tunisassiassanik qulakkeerinnikkumallutik suliaqarnerat pillugu nersualaarpai.
Pisassiissutilli Polar Raajanut tussagaluarpataluunniit, Bent Sallingip tunisassiorfimmi allannguisoqarnissaa oqaluttuaraa.
-kisianni immaqa oqaatigilluaannarlugu raajaleriffittaa taanna ingerlaqqinnissaa takusinnaanngilarput.
Taamaattumik Polar Seafoodip aaqqiissutaasinnaasutut isigisaasa ilagaat tunisassiorfimmi saattussat, qalerallit saarulliillu ukioq kaajallallugu tunisassiarineqarsinnaanerat.
-Taakku ukioq kaajallallugu pigilerneqartuuppata fabrikkip ammaannarnissaa imminullu napatissinnaasumik ingerlasinnaanissaa qulakkeerneqassooq.
Raajartassiissutit ikinnerusassasut
Bent Sallingip tunisassiorfiup raajanik suliaqarfiuinnarani allanik suliaqarfiuleriartornissaa pisariaqartutut isigaa.
-Massakkut TAC-p apparnerata qaffaqqinneranut killikkaluaruttaluunniit eqqaamassavarput ukiut arfineq pingasut qaangiuppata uagut suliffeqarfittut raajanik pigisassagut appartinneqartussaapput. Taamaalilluta TAC qaffakkaluartoq suli pigisagut appariartinneqartussaapput pingajorarterutaanik.
Pisortap aalisarneq pillugu inatsit nutaaq siorna pilersinneqartoq uani innersuussutigaa. Inatsimmi ingerlatseqatigiiffiit annerusut raajartassiissutit ilaannit ikinnerusunik pissarsinissaat siunertarineqarpoq.
Politikerit taamaaliornikkut amerlanerusut pisassiissutinik pissarsisinnaaniassammata pisassiissutit amerlanerusut ingerlatsiffinnut minnerusunut agguataarusuppaat.
-Taamaammat imminut akilersinnaasoq takusinnaannginnatsigu raajarniarnermi/raajalerinermi. Taamaammat allanik ujartuivugut fabrikkip ataavartumik suliassaqarnissaanut.
Piginnittut amerlanerusut
Polar Seafood pisassiissutit piginnittunut amerlanerusunut siammarterisariaqartinneqartoq, Bent Sallingip oqaatigaa.
Ingerlatseqatigiiffiup tamanna pitsaasutut isigaa, piginneqatigiiffiullu ataani pilersinneqaqqammersumit Qeqertalik Seafoodimit qinnuteqaatoqarneratigut Polar Seafoodip neqerooruteqarneq illorraap tungaanut alloriarnermi siullertut isigaa.
-Taamaammat uagut una qinnuteqartitsineq tigulluartorujussuuarput, aammalu aqqutissatut pitsaasutut isigalugu. Neriuppugut alloriarneq una siulliusoq.
-Alloriarnerup tullerisisussaassavaa aamma pigisat pisassat pigisat amerlanerusunut siammarneqarnissaannut aamma ikorfartueqataassammat ingerlariartitseqqissallunilu.
Qeqertalik Seafoodimi siullermik alloriartoqassasoq pisortap oqaatigaa.
Uanilu kilisaatini aalisariutinilu allani inuttat, ilinniartut officerit piginneqataalernissamut periarfissaqalernissaat sulissutigaat.
-Taamaalilluta eqqartortarnikuusagut pilersaarutigullu piviusunngortikkiartuaarpagut.
