Aasarsioqatigiisitsineq meeqqanut iluaqutaasussaq

Qeqertarsuarmi meeqqat inuusuttullu sapaatit-akunnerisa marluk ingerlaneranni sammineqarsinnaasut assigiinngitsut, soorlu timersorneq, isumasioqatigiisitsinerit aamma ataatsimoorlutik ingerlanneqartunut assigiinngitsunut pingasunngornermiit peqataasinnaalissasut, Peqatigiiffik Kalaallit Meerartaannit nalunaarutigineqarpoq.

Kommuni Qeqertalimmi borgmesterip, Simigaq Heilmannip, suliniut nuannaarutigaa.

- Kommunitsinni Kalaallit Meerartaat isumaqatigiissuteqarfiginikuuagut, illoqarfinnguami Qeqertarsuartut ittumi pingaaruteqartoq patajaallisarniarlugu, tassalu minnerunngitsumik meerartagut inuusuttagullu peroriartornerini pitsaasunik atugassaqartikkumallugit ataatsimoorluta iliuuserisinnaasagut. 

Aasaq puigunaatsoq

Namminneq kajumissutsimikkut sulisut, nunatsinneersut nunanillu tamalaaneersut aaqqissuisuussapput, soorlu Hong Kongimeersut, Tjekkiameersut, Spaniameersut Estlandimeersullu namminneq nunaminnit pinnguaatinnaajusunik saqqummiinerinut malinnaasoqarsinnaassaaq.

Meeqqat aasaanerani piffissaq nuannersumik puigunaatsumillu atussagaat, taakku ataatsimoorlutik qulakkiissavaat.

- Ilaqutariit ilaat aasakkut allamukarnissaminnut periarfissaqartanngillat, angajoqqaallu arlallit aasakkut sulisariaqartarput meeqatillu feeriaqatigisinnaanagit, taamaammat aasarsiortitsineq meeqqanut inuusuttunullu neqeroorutaavoq qujanarluinnartoq – sammisassanik peqataaffigisinnaanngisaraluinik sammisaqarnissaannik periarfissiisoq, Borgmester Simigaq Heilmann oqarpoq.

Kinguneqarluarnissaa eqqarsaatigalugu aaqqissuussaavoq

Aasarsioqatigiinnerli pinnguarnerinnarmik siunertaqanngilaq.

Peqatigiiffik Kalaallit Meerartaannit tunuliaqutaqartumit, suleriaaseq "Ikioqatigiinnermik" taaneqartoq ingerlanneqarpoq.

Illoqarfimmi ataatsimooqatigiinnerup illoqarfimmilu sunngiffimmi sammisassat pitsanngorsarnissaat pillugu suliniut ingerlanneqarpoq. Tamannalu Simigaq Heilmannimit taperserneqarpoq. 

- Qularinngilluinnarpara sunngiffimmi sammisaqartitsinerit pitsaaliuinermut iluaqutaasartut, tamatumanilu aasarsiortitsineq aamma ungasinnerusoq eqqarsaatigalugu suliniut  ’Ikioqatigiinneq’ neqerooruteqarsinnaapput, namminneq kajumissutsimikkut suliaqartut peqatigiiffiillu iiluaqutigisinnaasaannik, Simigaq Heilmann oqarpoq.

Peqatigiiffik Kalaallit Meerartaat 2014-imiilli aasarsioqatigiinnernik ingerlatsisarpoq.

Ukioq manna juulip quliganiit juulip ulluisa 23-iat tikillugu, Qeqertarsuarmi Nanortalimmilu sammisaqartitsissapput.